काठमाडौबाट ३ सय बढी विदेशी नागरिकको ‘चार्टर विमान’ मार्फत् उद्दार

Best Khabar Team | २०७७ बैशाख २० गते शनिबार

०२ मे, २०२०
काठमाडौं । लकडाउनका कारण नेपालका विभिन्न क्षेत्रमा रोकिएका सयौं पर्यटक आज काठमाडौंबाट फ्रान्सको राजधानी पेरिस उडेका छन् । काठमाडौंमा रहेको फ्रान्सेली दुतावासको सहकार्यमा देशका विभिन्न क्षेत्रमा रहेकामध्ये ३ सय ९ जना पर्यटकलाई आज काठमाडौंबाट कतार एयरले फ्रान्स लगेको हो । त्यसमा फ्रान्सलगायत विभिन्न युरोपेली तथा अफ्रिकी मुलुक, अमेरिका, क्यानडालगायतका देशका नागरिकहरु रहेको बताइएको छ ।

नेपालमा कोरोना संक्रमण फैलन नदिन सरकारले लकडाउन गर्दा देशका विभिन्न क्षेत्रमा पदयात्रामा पुगेका ती नागरिकहरु त्यहि रोकिएका थिए । पछि उनीहरुलाई विभिन्न माध्यमबाट काठमाडौं ल्याएर राखिएको थियो । आज काठमाडौंस्थित फ्रान्सेली दुतावासले चार्टर गरेको विमानमा चढेर उनीहरु पेरिस लागेका हुन् । कतार एयरको ठूलो जहाजमार्फत् उनीहरुलाई कतारको राजधानी दोहा हुँदै पेरिस लगिने विमानस्थल स्रोतले जानकारी दिएको छ । सरकारले आगामी बैशाख २५ सम्म लकडाउन र जेठ २ सम्म अन्र्तराष्ट्रिय उडानमा प्रतिबन्ध लगाएका कारण विदेशी पर्यटकहरु प्रभावित भएका थिए ।

***काठमाडौंमा रहेको फ्रान्सेली दुतावास***

तर नेपालमा रहेका विदेशी नागरिकलाई लैजानका लागि चार्टर विमान उड्न पाउने भएपछि काठमाडौंमा जम्मा पारिएका ३ सय ९ जना विदेशी पर्यटक आज गन्तव्यतर्फ उडेका हुन् । उनीहरु पेरिसमा पुगेपछि त्यहाँबाट सम्बन्धित देशको दूतावासले समन्वय गरेर उनीहरुलाई स्वदेश फर्काउने बताइएको छ । यसअघि पनि विभिन्न देशका नागरिकहरुलाई सम्बन्धित देशले विमान चार्टर गरेर स्वदेश फिर्ता लगिसकेको छ । पछिल्लो पटक बंगलादेश र भुटान सरकारले आफ्ना देशका नागरिकलाई स्वदेश फिर्ता लगेका थिए ।