आफ्ना बारेमा चलेका निराधार हल्ला चिर्दै १८ दिनपछि झुल्किए उत्तर कोरियाली राष्ट्रपति किम

Best Khabar Team | २०७६ माघ २२ गते बुधबार

०२ मे, २०२०
सिओल, दक्षिण कोरिया । आफ्ना बारेमा चलेका सबै हल्लाहरुलाई झूटो सावित बनाउँदै उत्तर कोरियाली नेता किम जोङ्ग उल सार्वजनिक भएका छन् । उत्तर कोरियाली सञ्चारमाध्यमले हिजो सार्वजनिक गरेको श्रव्यदृष्य सामग्रीमा एउटा कार्यक्रमको उद्घाटनमा किम रिबन काट्दै हुन्छन् । उनी सार्वजनिक भएको सो कार्यक्रममा उनकी बहिनी र सरकारका बरिष्ठ अधिकारीहरु समेतलाई देख्न सकिन्छ ।

उत्तर कोरियाली मिडियाहरुका अनुसार राजधानीमा आयोजित एउटा रासायनिक मल कारखानाको उद्घाटन कार्यक्रममा किम सार्वजनिक भएका हुन् । गएको अप्रिल १२ मा एउटा सार्वजनिक कार्यक्रममा देखिएका किम त्यसयता गुमनाम भएका थिए । अप्रिल १५ मा हजुरबुबाको जन्मदिनको अवसरमा गरिएको एउटा राष्ट्रिय कार्यक्रममा समेत उनी नदेखिएपछि विभिन्न गुप्तचर निकायहरुले उनी मुटुको समस्याबाट गम्भीर विरामी परेपछि कोमामा गएको रिपोर्ट सार्वजनिक गरेका थिए ।

कतिपयले भने उनको मृत्यु भएको दाबी समेत गरिसकेका थिए । तर यी सबै निराधार हल्लालाई चिर्दै उत्तर कोरियाली नेता किम सार्वजनिक भएपछि विश्व जगतमा फेरि एकपटक खुसीको सञ्चार भएको छ । यसअघि ६ वर्षअघि पनि उनी करिब ६ साता सार्वजनिक कार्यक्रममा नदेखिँदा उनका बारेमा अनावश्यक हल्ला र अड्कलबाजी गरिएका थिए ।

करिब १८ दिन अघि एउटा सार्वजनिक कार्यक्रममा सहभागी किम त्यसपछि बाहिर देखिएका थिएनन् । उनी हालै सहभागी एउटा सार्वजनिक कार्यक्रमको भनिएको फोटो र भिडियोमा उनी निक्कै स्वस्थ्य देखिन्छन् । राष्ट्रिय महत्वका कार्यक्रममा किम अग्र मोर्चामा देखिने भएपनि हालै भएका केही कार्यक्रममा उनी नदेखिँदा विभिन्न खाले अड्कलबाजी र अफवाह फैलिएको हो ।