सरकारको निर्णय : बैशाख ३१ सम्म सीमा नाका बन्द, कोरिया जाने कामदार अब नरोकिने

Best Khabar Team | २०२६ पुष १७ गते बिहिबार

२६ अप्रिल, २०२०
काठमाडौं । सरकारले आगामी बैशाख ३१ गते राति १२ बजेसम्मका लागि नेपालसँग सीमा जोडिएका छिमेकी चीन र भारतको सिमावर्ती क्षेत्रमा आवागमन रोक्ने निर्णय गरेको छ । नेपाल सरकार मन्त्रीपरिषद्को आज बसेको बैठकले दुबै देशमा कोरोना संक्रमण जारी रहेको भन्दै चीन र भारतसँगको सीमावर्ती क्षेत्रमा गाडी तथा मानिसको आवागमन रोक्ने निर्णय गरेको हो ।

भारतमा दैनिक सयौंको संख्यामा कोरोना संक्रमितहरु थपिँदै गएको र नेपाल भारत खुल्ला सिमाका कारण तत्कालका लागि सिमा खुला गर्न नसकिने सरकारको भनाई छ । भारतले पनि अहिले नेपाललगायत छिमेकी मुलुकहरुसँगको बन्द गरेको सन्दर्भमा नेपाले पनि सीमा नाका बन्द गर्ने निर्णयलाई निरन्तर बैशाख मसान्तसम्म जारी राख्ने निर्णय गरेको हो ।

यसअघि सरकारले गएको चैत्र १० गतेदेखि भारत र चीनको सीमावर्ती नाकाबाट मानिसहरुको आगावमन रोक्ने निर्णय गरेको थियो । यस्तै सरकारले रोजगार अनुमति प्रणालीबाट कोरिया जानका लागि भाषा परिक्षा उत्तीर्ण गरेकाहरुलाई प्रक्रिया पु-याएर विदेश जान दिने भएको छ । कोरियन सरकार नेपाल सरकारबीचको सहमति अनुसार यसरी पठाईने कामदारको स्वाथ्थ चेकजाँच कोरिया सरकारले नै गर्ने छ ।

कोरियामा कामदार भिषा पाएर नेपालमै रोकिएका सयौं कामदार तथा छुट्टीमा आएकाहरुलाई नेपालबाट आवश्यक प्रक्रिया पु-याएर पठाईने भन्दै सरकारले कोरिया पुगेपछि कोरियन सरकारले उनीहरुको स्वास्थ्य जाँच गर्ने जनाएको छ ।सरकारले कोरिया पठाउने कामदारलाई कसरी र कुन माध्यमबाट विदेश पठाउने भन्ने विषयमा भने केही बताएको छैन ।

किनभने सरकारले आगामी जेठ २ गतेसम्मका लागि सबै अन्र्तराष्ट्रिय तथा राष्ट्रिय उडानहरुमा प्रतिबन्ध लगाईसकेको छ । कोरोनाका कारण लकडाउन लम्बिएपछि अहिले देश तथा विदेशमा हुने सबै यात्रुबाहक विमानको उडान ठप्प छ ।