पोर्चुगलका चिकित्सकको मर्मस्पर्शी भिडियो, जसले भाबुक तुल्याउँछ (भिडियोसहित)

Best Khabar Team | २०७७ बैशाख १३ गते शनिबार

२५ अप्रिल, २०२०
पोर्तिमाउ । विश्वभर कोरोनाको महामारी चलिरहँदा यसको सबैभन्दा प्रत्यक्ष मारमा परेको एउटा समूह हो चिकित्सक । कोरोनाको संक्रमणबाट विरामीपछि सबैभन्दा बढी प्रभावित व्यक्तिका रुपमा चिकित्सक पर्दछन् । जतिसुकै विरामी आएपनि चिकित्सकहरुले अहोरात्र खटेर उनीहरुको उपचारमा समय खर्च गरिरहेका छन् ।

त्यसमा पनि अहिलेको कोरोनाको महामारी । पछिल्ला केही महिनायता युरोपका विभिन्न देशमा महामारीको रुपमा फैलिएको छ कोरोना । कोरोनाबाट युरोपका इटली, स्पेन, फ्रान्स, बेल्जियम, नेदरल्याण्ड, जर्मनी, स्वीडेन, स्वीट्जरल्याण्ड, पोर्चुगललगायतका देशहरु प्रभावित बनेका छन् । स्पेनसँग सिमाना जोडिएको भएपनि पोर्चुगलमा अहिलेसम्म तुलनात्मक रुपमा कोरोनाले महामारीको रुप लिन पाएको छैन ।

सँगैको छिमेकी देशमा कोरोनाबाट २२ हजार ९ सय २ जनाको ज्यान गै सक्दा पोर्चुगलमा हालसम्म ८ सय ८० जनाले ज्यान गुमाएका छन् । यस्तै संक्रमितको संख्या पनि निक्कै बढी छ स्पेनमा पोर्चुगलको तुलनामा । हालसम्म स्पेनमा २ लाख २३ हजार ७ सय ६० जना संक्रमित भेटिएका छन् भने पोर्चुगलमा मात्रै २३ हजार २ सय ९२ जना संक्रमित पुष्टि भएका छन् । महामारीका बीच सँधै विरामीको उपचारमा खटिइरहने चिकित्सकहरुले बेला बखत सामाजिक सञ्जालमार्फत् माफ्नो पिडा तथा सन्देशहरु सार्वजनिक गर्ने गरेका छन् । यसैक्रममा शनिबार पोर्चुगलका चिकित्सकहरुले बनाएको एउटा भिडियो सार्वजनिक भयो ।

सामाजिक सञ्जाल टिकटकमार्फत सार्वजनिक सो भिडियो निक्कै मर्मस्पर्शी थियो । ६ जना स्वास्थ्यकर्मीहरु अस्पतालको हाताभित्र एउटा बेडमा बसेर अघि बढ्दै थिए । अगाडिका दुईजना महिला स्वास्थ्यकर्मीमध्ये पछिल्लोले अघिल्लोलाई अँगालो हालेको देखिन्छ भने पछाडिका अरु तीनजनाले हातमा स्वास्थ्य उपचारमा प्रयोग हुने विभिन्न उपकरणलाई ढुंगा खियाउने नाउको रुपमा प्रयोग गरिरहेका देखिन्छन् । यस्तै अन्तिममा रहेका एकजना पुरुष स्वास्थ्यकर्मीले डुंगारुपी सो बेडलाई धकलिरहेका हुन्छन् ।

१२ सेकेन्डको सो भिडियोमा प्रस्तुत भिडियोले के सन्देश दिन खोजेको देखिन्छ भने ‘कोरोनारुपी ढुंगालाई निश्चित गन्तव्यमा पु-याउन चिकित्सकहरु एउटा निर्दिष्ट लक्ष्य लिएर अघि बढिरहेका छन् । उनीहरु यो कार्यमा सफल हुनेमा आशावादी देखिन्छन् ।’ हामी पनि कामना गरौं विश्वले कोरोनालाई जित्न सकोस् र भोलिका दिनमा विश्वबाट कोरोना भाइरस उन्मुलन भएको सुन्न पाइयोस् । यी र यस्ता लाखौं चिकित्सक जो कोरोनाको महामारीमा आफ्नो ज्यानलाई बाजी लगाएर विरामीको सेवामा खटिएका छन्, उनीहरुप्रति साधुवाद ।