बेलायतमा कोरोनाबाट थप २ नेपालीको ज्यान गयो

Best Khabar Team | २०७७ बैशाख १२ गते शुक्रबार

२४ अप्रिल, २०२०
बेस्टह्याम । पछिल्लो पटक बेलायतमा कोरोना संक्रमणबाट एक नेपाली युवतीको ज्यान गएको छ । लण्डनको नटिन्टनमा बस्दै आएकी ३२ वर्षकी बीमा नाछिरिङ्गको कोरोना संक्रमणमा परी २ दिन अघि ज्यान गएको हो । २ सातायाता कोरोनाको संक्रमण देखिएपछि उनी अस्पतालमा उपचाररत थिइन् । तर उपचारकै क्रममा मंगलबार राति उनको ज्यान गएको अस्पतालको भनाई उद्दृत गर्दै बेलयातमा रहेका उनका नातेदारहरुले बताएका छन् ।

मृतक बीमाको नेपालको घर खोटाङ्ग जिल्लाको ऐसेलुखर्क गाउँपालिका रहेको बुझिएको छ । बेलायतको जर्ज इलिट अस्पतालमा उपचाररत उनको स्वास्थ्य अवस्था पछिल्लो ४ दिन यता नराम्ररी विग्रेको थियो । मृगौलाको रोगबाट पीडित बीमा गएको वर्षमात्रै बेलायत आएको बताइएको छ । उनी पूर्व पूर्व बृटिस गोर्खा बुबा तथा आमाको साथमा बेलायतमा बस्दै आएकी थिइन् । उनी अविवाहित रहेको बुझिएको छ ।

बेलायतमा कोरोनाका कारण ज्यान गुमाउने उनी सबैभन्दा कम उमेरकी युवती हुन् । यसैबीच लण्डनमै कोरोना संक्रमणबाट अर्का एक बृद्दको पनि ज्यान गएको छ । नेपालको झापा घर भएका हंसराज लिंङ्गदेनको पनि कोरोनाको संक्रमणमा परी ज्यान गएको हो । बेलायतको रेडिङमा बस्ने पूर्व प्रधानाध्यापक समेत रहेका लिङ्देनको लण्डनको रोयल बर्कसायर अस्पतालमा निधन भएको बताइएको छ । उनी २० दिनअघि उपचारका लागि अस्पताल भर्ना भएका थिए ।

झापा खुदुनाबारीको जनता माध्यामिक विद्यालयका पूर्व प्रधानाध्यापक रहेका हंसराज विगत १४ वर्षदेखि लण्डनमा बस्दै आएका थिए । यो सँगै बेलायतमा कोरोनाका कारण ज्यान गुमाउने नेपालीको संख्या २० पुगेको छ ।