नेपालमा कोरोना : चौथो संक्रमितपनि डिस्चार्ज, २७ को उपचार चल्दै

Best Khabar Team | २०७७ बैशाख ७ गते आइतबार

१९ अप्रिल, २०२०
धनगढी । नेपालमा कोरोना संक्रमणमा परी निको भएर घर फर्कनेहरुको संख्या ४ पुगेको छ । आज कैलाली लम्कीका २१ वर्षका युवकले कोरोनालाई जितेका हुन् । धनगढीस्थित सेती प्रादेशिक अस्पतालमा उपचाररत ती युवकको ल्याव परीक्षणका क्रममा पछिल्लो ४ पटक नै नेगेटिभ रिपोर्ट आएपछि उनलाई आज अस्पतालले डिस्चार्ज गरेको हो । यसअघि कोरोना संक्रमित तीन जनाको डिस्चार्ज भै सकेको छ ।

हिजो मात्रै काठमाडौंकी १९ वर्षकी युवती, बाग्लुङ्गकी ६५ वर्षकी बृद्द तथा गएको फागुनमा काठमाडौंमा एक युवकले कोरोना जितिसकेका छन् । आज कोरोना जित्ने युवक कोरोनाको संक्रमणमा परी विगत १६ दिनदेखि अस्पतालको आइसोलेसनमा बस्दै आएका थिए । रोजगारीको लागि भारत पुगेका ती युवकमा कोरोनाको संक्रमण देखिएपछि उनलाई चैत्र २२ गतेदेखि अस्पतालको आइसोलेसनमा राखेर उपचार अघि बढाईको थियो ।

नेपालमा हालसम्म कोरोना संक्रमितको संख्या ३१ पुगेको भएपनि यसमध्ये ४ जना उपचारपछि घर फर्किसकेका छन् । अब बाँकी २८ जनाको उपचार देशका विभिन्न अस्पतालहरुको आइसोलेसनमा भै रहेको छ । ती मध्ये १३ जना भारतीय नागरिकहरु रहेका छन् । अस्पतालमा उपचारमा रहेकाहरु सबैको अवस्था सामान्य रहेको बताइएको छ ।

Comment from facebook