आयल निगमले किनेको जग्गा विवाद : संसदीय समितिले अनुगमन गर्ने

Best Khabar Team | २०७४ श्रावण २२ गते आइतबार

०६ अगस्ट, २०१७
काठमाडौं । नेपाल आयल निगमले पेट्रोलियम पदार्थ भण्डारणका लागि खरिद गरेको भनिएका केही विवादास्पद जग्गाहरुको संसदीय समितिले स्थलगत अनुगमन गर्ने भएको छ । निगमले जग्गा खरिद प्रक्रियामा व्यापक अनियमितता गरेको भन्दै चौतर्फी गुनासो बढेपछि संसदको उद्योग, वाणिज्य तथा उपभोक्ता हित सम्बन्ध समितिको आज बसेको बैठकले खरिद गरिएका जग्गाहरुको स्थलगत अध्ययन गर्ने निर्णय गरेको हो ।

निगमले विभिन्न प्रदेशमा खरिद गरेको जग्गामा निगमका प्रमुखले व्यापक अनियमितता गरेको तथा आफ्नै छोराको कम्पनीमार्फत् जग्गा खरिद गरेर ठूलो आर्थिक चलखेल गरेको आरोप लगोपछि समितिले यो विषयमा चासो दिएर छलफल थालेको थियो । निगमले पूर्वी नेपालको झापा देखि, सर्लाही, चितवन, भैरहवालगायत विभिन्न प्रदेशमा जग्गा खरिद गरेको थियो ।

समितिले सो जग्गा खरिद प्रक्रियाका बारेमा प्रयोग गरिएको फायलहरु झिकाएर अध्ययन गरिरहेको छ । अनुगमनका क्रममा प्रमुख जिल्ला अधिकारीदेखि स्थानीय जनतासम्म पुगेर त्यसको बारेमा सत्यतथ्य छानबिन गर्ने समितिको भनाई छ ।

स्थलगत अध्ययनका लागि समिति केही दिनभित्रै विभिन्न जिल्लामा रहेका निगमको जग्गा खरिद स्थलमा पुग्ने तयारीमा जुटेको छ ।