अमेरिकामा कोरोना ताण्डव : मंगलबार एकैदिन २४ सय भन्दा बढीको मृत्यु

Best Khabar Team | २०७७ बैशाख ३ गते बुधबार

१५ अप्रिल, २०२०
न्यूर्योक । अमेरिकामा पछिल्लो केही सातायता महामारीको रुपमा फैलिएको कोरोना (कोभिड १९) को संक्रमणबाट ठूलो संख्यामा मानिसहरुको हताहित हुन थालेको छ । अहिले अमेरिकामा दैनिक सयौंको संख्यामा आम नागरिकहरुले कोरोनाकै कारण ज्यान गुमाईरहेका छन् ।

मंगलबार २४ घण्टाको तथ्यांकलाई आधार बनाउने हो भने अमेरिकामा २ हजार ४ सय ४ जनाले ज्यान गुमाएका छन् । यो विश्वकै इतिहासमा अहिलेसम्म एकैदिन कोरोनाबाट ज्यान गुमाउनेहरुको (एउटामात्रै देशमा) सबैभन्दा बढी तथ्यांक हो । अमेरिकामा मंगलबार २६ हजार ९ सय ४५ जना नयाँ कोरोना संक्रमित भेटिएका छन् ।

कोरोनाका कारण अमेरिकाको राजधानी न्यूर्योक सबैभन्दा बढी प्रभावित बनेको छ । न्यूर्योकमात्रै मंगलबार ७ सय ७८ जनाले कोरोनाकै कारण मृत्युबरण गर्नुपरेको छ । यस्तै न्यूजर्सीमा ३ सय ६२, मिचिगनमा १ सय ६६, लुसिनियामा १ सय २९, पेन्सिलभेनियामा १ सय ६ जनाको कोरोनाकै कारण ज्यान गएको छ ।

न्यूर्योकमा मात्रै ७ हजार ४ सय ६८ जना नयाँ संक्रमित मंगलबार फेला परेका छन् । हालसम्म न्यूर्योकमा मात्रै कोरोनाका कारण १० हजार ८ सय ३४ जनाले ज्यान गुमाईसकेका छन् । विश्वमा अहिलेसम्म अमेरिका नै कोरोनाबाट सबैभन्दा बढी प्रभावित बनेको छ । अमेरिकामा यो समाचार तयार गर्दासम्म ६ लाख १३ हजार ८ सय ८६ जनामा कोरोना संक्रमण फैलिइसकेको छ ।