हुम्लामा पनि जीप दुर्घटना, सबै यात्रु नदीमा वेपत्ता, खोजी जारी

Best Khabar Team | २०७६ असार ३ गते मंगलबार

१७ जुन, २०१९
काठमाडौं । विकट पहाडी जिल्ला बझाङ्मा जीप दुर्घटना भै करिब एक दर्जनले ज्यान गुमाएको २४ घण्टा वित्न नपाउँदै आज फेरि अर्को विकट पहाडी जिल्ला हुम्लामा जीप दुर्घटना भएको छ । जिल्लाको खार्पुनाथ गाउँपालिकाबाट सदरमुकाम जाँदै गरेको जीप कर्णाली नदीमा खसेर वेपत्ता भएको हो ।

सदमुकाम सिमिकोट जाँदै गरेको लु १ ज ७१६६ नम्बरको जीप स्थानीय याङ्चुबाट करिब २ सय मिटर तल कणाली नदीमा खसेको हो । सो जीपमा कम्तीमा १० जना यात्रु सवार रहेको जिल्ला प्रहरी कार्यालयको भनाई छ । घटनालगत्तै अहिले स्थानीय वासिन्दा, प्रहरी तथा स्थानीय प्रशासन घटनास्थल पुगेको छ । जीप नदीमा खसेकोले यात्रुहरुको उद्धारमा कठिनाई भैरहेको स्थानीयको भनाई छ ।

दुर्घटनाग्रस्त जीपमा खर्पुनाथ गाउँपालिकाका उपाध्यक्ष तथा उहाँको परिवारका सदस्यहरु समेत रहेको बताइएपनि यसको पुष्टि भै सकेको छैन । हुम्लाका प्रमुख जिल्ला अधिकारी धोलकराज ढकालका अनुसार अहिले सशस्त्र प्रहरी, नेपाल प्रहरी तथा स्थानीय वासिन्दा र स्थानीय प्रशासनबाट पुगेकाहरुले जीपमा सवार यात्रुहरुको खोजी जारी रहेको छन् । यसअघि हिजो बझाङमा बसेको जीप दुर्घटनामा कम्तीमा १० यात्रुको ज्यान गएको थियो ।