बेलायतमा कोरोना : अर्का नेपालीको निधन, कास्की घान्द्रुकका गुरुङ्गले गुमाए अस्पतालमा ज्यान

Best Khabar Team | २०७७ बैशाख १ गते सोमबार

१३ अप्रिल, २०२०
लण्डन । बेलायतमा कोरोनाको संक्रमणबाट पूर्व गोर्खा सैनिकको ज्यान गएको छ । नेपालको कास्की जिल्लाको पर्यटकीय नगरी घान्द्रुक घर भएका दक्षिणबहादुर गुरुङ्गको कोरोनाको संक्रमणका कारण आज ज्यान गएको उनका आफन्तहरुले जनाएका छन् ।

६५ वर्षका गुरुङ्गको लण्डनको रेडिङ बर्कशायर अस्पताको भेन्टिलेटरमा उपचारका क्रममा ज्यान गएको हो । उनी आफ्नी श्रीमती र दुई छोरीका साथ बेलायतको रेडिङमा बस्दै आएका थिए । करिब २ साता अघि स्वास्थ्थ अवस्था विग्रेपछि उनी अस्पतालमा भर्ना भएका थिए । परीक्षणका क्रममा उनमा कोरोनाको संक्रमण भएको पुष्टि भएपछि अस्पतालको आइसोलेसनमा राखेर उपचार थालिएको थियो । निकै बलियो र तन्दरुस्त देखिने गुरुङ्को कोरोनाको कारण ज्यान गएको भनेर विश्वास नै गर्न नसकिने उनलाई नजिकबाट चिन्नेहरु बताउँछन् ।

गुरुङ्ग लण्डनमा ज्यान गुमाउने छैठौ पूर्व गोर्खा सैनिक तथा आठौं नेपाली हुन् । यसअघि पाँच जना पूर्व गोर्खा सैनिक र अरु दुई जना नेपालीको कोरोनाको कारण लण्डनमा ज्यान गै सकेको छ । आज ज्यान गुमाएका गुरुङ्ग पूर्व गोर्खा सैनिक भएकोले अहिले पनि नियमित रुपमा शारीरिक व्यायम र साइकल चलाउने काम गर्दथे ।

यस्तै धुम्रपान तथा मध्यपान पनि उनी पहिल्यै देखि नगर्ने उनले कोरोनाको कारण ज्यान गुमाउँदा उनका आफन्त तथा परिवारजले यसलाई अकल्पनीय बनेको छ । यो समाचार तयार पार्दासम्म बेलायतमा कोरोनाका कारण ११ हजार ३ सय २९ जनाको ज्यान गै सकेको छ ।