बेलायती प्रधानमन्त्री बोरिसको अवस्था जटिल बनेपछि आइसियुमा उपचार हुँदै

Best Khabar Team | २०७६ चैत्र २४ गते सोमबार

०६ मार्च, २०२०
लण्डन । कोरोना भाइरसको संक्रमणपछि घरमै आइसोलेसनमा रहेका बेलायती प्रधानमन्त्री बोरिस जोनसोनको अवस्था गम्भीर बनेको छ । कोरोनाको संक्रमण भएपछि आफ्नै निवासमा आराम गरिरहेका बोरिसको स्वास्थ्य विग्रँदै गएपछि चिकित्सकहरुको सल्लाह अनुसार उनलाई हिजो अस्पतालको आइसोलेसन कक्षमा राखिएर उपचार थालिएको थियो ।

तर त्यसको २४ घण्टा वित्न नपाउँदै उनको स्वास्थ्य जटिल बन्दै गएपछि उनलाई अति सघन कक्षमा राखेर उच्च निगरानीमा उपचार गरिँदै छ । गत मार्च २७ मा उनमा कोरोनाको संक्रमण भएको पुष्टि भएपछि उनी त्यसयता घरमै आइसोलेसनमा बस्दै आएका थिए । प्रधानमन्त्रीले अत्यावश्यक काम सबै काम र बैठकहरु आफ्नो घरबाटै भिडियो कन्फरेन्स र इमेलमार्फत् सञ्चालन गर्दै आएको भएपनि पछिल्लो केहीदिन यता उनको स्वास्थ्य थप जटिल बन्दै गएपछि उनलाई हिजो लण्डनस्थित अस्पतालमा भर्ना गरिएको थियो ।

लण्डनको सेन्ट थोमस हस्पतालमा उपचाररत नको अवस्था स्थिर रहेको बिबिसीले जनाएको छ । ५५ वर्षका प्रधानमन्त्री जोनसोनमा १० दिन अघि कोरोना पोजेटिभ भएको पुष्टि भएको थियो । यो समाचार तयार पार्दासम्म बेलायतमा कोरोनाका कारण ५ हजार ३ सय ७३ जनाको ज्यान गएको छ भने ५१ हजार ६ सय ८ जना संक्रमित भेटिएका छन् ।

पछिल्लो २४ घण्टामा ४ सय ३९ जनाले कोरोनाकै कारण ज्यान गुमाएका छन् । तर १ सय ३५ जना भने सफल उपचार पछि घर फर्केका छन् ।