अमेरिकामा २ हप्तामा ४ नेपालीको मृत्यु

Best Khabar Team | २०७६ चैत्र २३ गते आइतबार

०५ मार्च, २०२०
न्यूर्योक । अमेरिकाको न्यूर्योकमा पछिल्लो २ साता यता ४ जनाको मृत्यु भएको छ । पछिल्लो पटक हिजो अमेरिकाको न्यूर्योकस्थित सन्नीसाईटमा बस्दै आएका थोक्मे विष्टको ज्यान गएको छ । ४८ वर्षका उनको सन्नी साईटस्थित अपार्टमेन्टमै मृत्यु भएको र स्थानीय स्वास्थ्यकर्मीहरुको टोली आएर उनको शव उठाएको थियो ।

विष्टको नेपालको स्थायी घर मुस्ताङ्ग जिल्ला भएको बताइएको छ । उनमा टाउको दुख्ने, ज्वरो आउनेलगायतका लक्षण देखिएको थियो । शुरुमा सामान्य लक्षण देखिएपछि उनलाई अस्पतालमा उपचारका लागि लगिएको भएपनि चिकित्सकले घरमै बसेर आराम गर्न र सावधानी अपनाउन भन्दै औषधी दिएर घर फर्काएका थिए । घरमै आराम गरिरहेका बेला उनको एक्कासी निधन भएको उनका आफन्तहरु बताउँछन् । विष्टका श्रीमती र छोराछोरी काठमाडौंमा बस्दै आएका छन् । यस्तै मुस्ताङ्ग नै घर भएका सोनाम लामाको पनि निधन भएको छ । लामाको पनि कोरोनाकै संक्रमणको कारण ज्यान गएको हुनसक्ने अनुमान गरिएनि उनको ल्याब रिपोर्ट भने आईसकेको छैन ।

लामा न्युयोर्कको क्वीन्स जमैका भन्ने ठाउँको एक अपार्टमेन्टमा बस्दै आइरहेका थिए । केही दिनयता टाउको दुख्ने, ज्वरो आउनेलगायतका समस्याबाट पीडित भएपछि उनी घरमै एक्लै आराम गर्दै आइरहेका थिए । उनी झण्डै २ दशकदेखि अमेरिका बस्दै आएका थिए । उनको शव पनि प्रहरीले आएर उठाएर लगेको छ । यस्तै न्यूर्योकमै बसोबास गर्ने अजयमान छोँचुको पनि उपचारका क्रममा ज्यान गएको छ ।

छोँचुको एल्महस्ट्र अस्पतालमा आज निधन भएको न्यूर्योक निवासी बिष्णुमान प्रधानले जानकारी दिएका छन् । उद्यपि उनमा भने निमोनियाको लक्षण देखिएको बताइएको छ । प्रधानका अनुसार उनको हृदयघातका कारण ज्यान गएको हो । उनी श्रीमतीका साथ न्यूर्योक हाटइमा बस्दै आएका थिए ।

उनका छोरा र बुहारीसमेत न्यूर्योकमै बस्दै आएका थिए । स्मरणीय के छ भने मार्च २४ मा कोरोना भाइरसको संक्रमणबाट न्यूयोर्कको कुइन्सस्थित ज्याकशन हाइटमा बस्ने ५० वर्षका अनिल लिम्बुको ज्यान गएको थियो ।

Comment from facebook