नेपालमा एकैदिन कोरोनाका थप ३ संक्रमित भेटिए, पहिलोपटक एकबाट अर्कोमा संक्रमण भएको पुष्टि

Best Khabar Team | २०७६ चैत्र २२ गते शनिबार

०४ मार्च, २०२०
काठमाडौं । नेपालमा एकैदिन थप तीन जनामा नयाँ कोरोना संक्रमित भेटिएका छन् । स्वास्थ्य तथा जनसंख्या मन्त्रालयले आज पत्रकार सम्मेलन गरी थप तीन जनामा कोरोनाको संक्रमण भेटिएको पुष्टि गरेको हो ।

यसअघि ६ जनामा कोरोना संक्रमण भएको पुष्टि भएको थियो भने आज थप तीनजना कोरोना संक्रमित थपिएसँगै कोरोना संक्रमितको संख्या ९ पुगेको छ । स्वास्थ्य मन्त्रालयले दिएको जानकारी अनुसार रोजगारीको लागि भारत पुगेका कैलाली र कञ्चनपुरका दुईजना र यसअघि संक्रमित भएकाको आफन्त गरी थप ३ जनामा कोरोना संक्रमण भेटिएको पुष्टि भएको हो । रोजगारीको लागि भारतको मुम्बई गएका कैलालीका २१ वर्षीय पुरूषमा कोरोनासँग मिल्दो जुल्दो लक्षण देखिएपछि उनी आइसोलेसनमा थिए ।

ल्याव रिपोर्टमा उनमा कोरोना संक्रमण भेटिएको पुष्टि भएको हो । यस्तै, ल्यावको रिपोर्ट अनुसार कञ्चनपुरका ४१ वर्षीय पुरूषमा पनि कोरोनाको संक्रमण भेटिएको पुष्टि भएको छ । उनी भारतको उत्तराखण्डबाट केही साता अघि कञ्चनपुर फर्केका थिए । यस्तै आज थप भएका अर्का एकजना महिला यसअघि कैलालीमा संक्रमित भेटिएका पुरूषका भाउजु रहेको मन्त्रालयले जनाएको छ । सेती प्रादेशिक अस्पताल धनगढीका अनुसार तीनै जना आइसोलेसनमा रहेको र उनीहरुको अवस्था सामान्य रहेको छ ।