कोरोना संक्रमणबाट आक्रान्त बन्दै युरोप : इटाली, स्पेन, फ्रान्स र नेदरल्याण्डको अवस्था भयाबह बन्दै

Best Khabar Team | २०७६ चैत्र ९ गते आइतबार

२२ मार्च, २०२०
एन्तोर्पेन, बेल्जियम । कोरोना भाइरसको संक्रमणका कारण युरोपका विभिन्न देशको जनजीवन नराम्ररी प्रभावित बनेको छ । ती देशमा कोरोना संक्रमितहरुको संख्या दिनदिनै बढ्दै गैरहेको छ भने मृतकको संख्या पनि बढ्न थालेको छ । पछिल्लो १ महिनायता देखिएको कोरोनाका कारण विशेष गरी युरोपका इटली, स्पेन, फ्रान्स, नेदरल्याण्ड, बेल्जियम, जर्मनीलगायतको देशमा ठूलो संख्यामा मानिसहरुको मृत्यु भएको छ भने १० औं हजार संक्रमित विभिन्न अस्पतालको आइसोलेसनमा उपचाररत छन् ।

युरोपमा हालसम्म कोरोनाबाट सबैभन्दा बढी प्रभावित मुलुकको रुपमा इटाली रहेको छ । इटलीमा यो समाचार तयार पार्दा (बेल्जियमको स्थानीय समय दिउँसो साढे ४ बजे) सम्म ४ हजार ८ सय २५ जनाको ज्यान गएको छ भने ५३ हजार ५ सय ७८ जनाको विभिन्न अस्पतालमा उपचार भै रहेको छ । इटलीमा हालसम्म ६ हजार ७२ जनाको सफल उपचार समेत भएको छ । इटलीमा हिजो एकैदिन २४ घण्टामा ७ सय मानिसको ज्यान गएको भएपनि पछिल्लो २४ घण्टामा कारोनाका कारण एकजनाले पनि ज्यान गुमाउनु परेको छैन । यस्तै इटलीपछि सबैभन्दा बढी संक्रमित रहेको देशको रुपमा स्पेन रहेको छ ।

स्पेनमा हालसम्म २८ हजार ५ सय ७२ जनामा कोरोनाको संक्रमण देखिएको छ । जसमध्ये १ हजार ७ सय ५३ जनाको कोरोनाको कारण ज्यान गै सकेको छ । स्पेनमा पछिल्लो २४ घण्टामा ३ सय ७२ जनाले कोरोनाको कारण ज्यान गुमाउनु परेको छ । यद्यपि २ हजार १ सय २५ जनाको भने सफल उपचार समेत भएको छ । यस्तै युरोपेली मुलुक जर्मनी पनि कोरोनाको कारण नराम्ररी प्रभावित बनेको छ । जर्मनीमा कोरोनाका कारण हालसम्म ९३ जनाको ज्यान गै सकेको छ । ती मध्ये ९ जना पछिल्लो २४ घण्टायता ज्यान गुमाउनेहरु रहेका छन् ।

जर्मनीमा पछिल्लो २४ घण्टामा १ हजार ६ सय १० जना कोरोनाका नयाँ संक्रमित भेटिएका छन् । जर्मनीमा पनि २ सय ६६ जना उपचारपछि घर फर्केका छन् । यस्तै फ्रान्समा कोरोनाका कारण १४ हजार ४ सय ५९ जना संक्रमित भएका छन् । ती मध्ये ५ सय ६२ जनाको कोरोनाकै कारण ज्यान गै सकेको छ । फ्रान्समा १ हजार ५ सय ८७ जनाको सफल उपचार पनि भएको छ । यस्तै युरोपको नेटरल्याण्डमा पनि कोरोनाका कारण हालसम्म १ सय ७९ जनाको ज्यान गएको छ । ती मध्ये ४३ जना पछिल्लो २४ घण्टा यता ज्यान गुमाउने रहेका छन् । हाल ४ हजार २ सय ४ जनाको अस्पतालमा उपचार भै रहेको छ भने २ जना उपचारपछि घर फर्केका छन् । यस्तै, युरोपको नर्वेमा हालसम्म २ हजार २ सय जना कोरोनाको संक्रमित भेटिएका छन् ।

नर्वेमा हालसम्म कोरोनाका कारण ६ जनाले ज्यान गुमाएका छन् । यस्तै स्वीडेनमा १६ जनाको ज्यान गएको छ भने १ हजार ९ सय भन्दा बढी विरामी परेका छन् । यस्तै डेनमार्कमा १ हजार ३ सय ९५ जना, पोर्चुगलमा १ हजार ६ सय जना कोरोना संक्रमित भेटिएका छन् । पोर्चुगलमा हालसम्म १४ जनाको कोरोनाको संक्रमणका कारण ज्यान गएको छ । यस्तै, फिनल्याण्डमा ७, पोल्याण्डमा १३, ग्रिसमा १३ तथा लक्जेम्बर्गमा ८ जनाको कोरोनाको कारण ज्यान गै सकेको छ । यी देशहरुमा अहिलेसम्म हरेक देशमा ६ सय भन्दा बढी संक्रमित भेटिएका छन् । युरोपको राजधानीको रुपमा रहेको बेल्जियममा भने हालसम्म कोरोनाका कारण ७५ जनाले ज्यान गुमाईसकेका छन् ।

बेल्जियममा ३ हजार ४ सय भन्दा बढी संक्रमित विभिन्न अस्पतालमा उपचारसत छन् । युरोपेली देशहरुले अहिले कोरोनासँग लड्न विशेष कार्यक्रम अघि सारेका छन् भने सबै देशले छिमेकीसँगको सिमामा कडाई गरेका छन् । कतिपयले अनिश्चितकालका लागि बन्द समेत गरेका छन् । यसका अलावा उनीहरुले अन्र्तदेशिय उडान पनि रोकेका छन् ।