सार्कका ८ राष्ट्रमा के छ कोरोना प्रकोप ? अंकमा हेर्नुहोस् पछिल्लो अपडेट

Best Khabar Team | २०७६ चैत्र ६ गते बिहिबार

१९ मार्च, २०२०
बन्दना सापकोटा । काठमाडौं । कोरोना भाइरसका कारण दक्षिण एसियाली क्षेत्रीय सहयोग संगठन (सार्क ) सम्बद्ध राष्ट्रहरुको जनजीवन पनि नराम्ररी प्रभावित भएको छ । यी सबै देशको पर्यटन तथा अन्य क्षेत्र लगभग ठप्प भएको छ । सार्क राष्ट्रमध्ये अहिलेसम्म कोरोनाका कारण भारत, पाकिस्तान, नेपाल, अफगानिस्तान, भुटान, श्रीलंका, बंगलादेश र माल्दिभ्सको जनजीवन नराम्ररी प्रभावित बनेको छ ।

अधिकांश देशले आफ्नो देशको सुरक्षाका लागि भन्दै छिमेकी देशसँगको सीमा बन्द गरिसकेका छन् भने हवाई तथा स्थल मार्गबाट आउने पर्यटकहरुको आवागमन रोकेका छन् । हेर्नुहोस् नेपाली समय अनुसार बिहीबार राति ८ बजेसम्म सार्क राष्ट्रमा कोरोना भाइरसको पछिल्लो अवस्था तलको बुँदागत शीर्षकमा ।

१. नेपाल
नेपालमा हालसम्म कोरोना भाइरसबाट प्रभावित मध्ये १ जना उपचारपछि घर फर्किसकेका छन् । त्यसपछि सरकारले कोरोना भाइरसको प्रकोपबाट बच्नका लागि आवश्यक पूर्वतयारीहरु सबै गरेको छ । सरकारले हिजोमात्रै विभिन्न देशबाट नेपाल आउने विमानहरुमाथि पूर्णरुपमा रोक लगाएको छ भने विद्यालय तथा क्याम्पस र त्यहाँ सञ्चालन हुने परीक्षा समेत स्थगित गरेको छ । नेपालमा विभिन्न अस्पतालमा कोरोनासँग मिल्दोजुल्दो लक्षण देखिएकाहरुको चेकजाँच भै रहेपनि यो समाचार तयार पर्दासम्म एकजनापनि कोरोना संक्रमित भेटिएका छैनन् ।

२. भारत
सार्कको अर्को राष्ट्र भारतमा हालसम्म कोरोनाका १ सय ९७ बटा केसहरु भेटिएका छन् । भारतमा पछिल्लो २४ घण्टामा २८ जना नयाँ कोरोना संक्रमितहरु भेटिएको त्यहाँका सञ्चारमाध्यमहरुले जनाएका छन् । यस्तै भारतमा कोरोनाबाट ज्यान गुमाउनेको संख्या ४ पुगेको छ । पछिल्लो २४ घण्टामा थप एकजनाको कोरोनाकै संक्रमणबाट ज्यान गएको छ । भारतमा कोरोना संक्रमित मध्ये २० जना भने स्वास्थ्य लाभ गरी घर फर्किसकेका छन् । भारत सरकारले पनि कोरोनाको सुरक्षा सतर्कता उच्च बनाउँदै छिमेकी देशहरुसँगको हवाई सेवा कटौती गरेको छ भने नाकाहरु पनि बन्द गरेको छ ।

३. पाकिस्तान
सार्कको अर्को राष्ट्र पाकिस्तानमा हालसम्म कोराना संक्रमितको संख्या ३ सय ८० पुगेको छ । ती मध्ये ७३ जना नयाँ थपिएका विरामी हुन् । पाकिस्तानमा हालसम्म कोरोनाका कारण एकजनाको पनि निधन भएको छैन भने १३ जना उपचारपछि घर फर्किसकेका छन् । पाकिस्तानले पनि कोरोनाको संक्रमण फैलन नदिन कडा स्वास्थ्य सुरक्षा रणनीति अपनाएको छ ।

४. अफगानिस्तान
यस्तै सार्कका ८ राष्ट्रमध्ये अफगानिस्तानमा अहिलेसम्म २२ जना कोरोना संक्रमितको त्यहाँका विभिन्न अस्पतालमा उपचार भै रहेका छन् । ती मध्ये १ जनाको उपचार सफल भएर घर फर्केका छन् । तुलनात्मक रुपमा अफगानिस्तानमा यसको प्रभाव न्यून छ भने नयाँ विरामी पनि भेटिएका छैनन । सिँगो अफगानिस्तानभर अहिलेसम्म २१ वटा कोरोनाको केस भेटिएको त्यहाँको स्वास्थ्य मन्त्रालयले जनाएको छ ।

५. बंगलादेश
बंगलादेशमा कोरोनाका कारण हालसम्म एकजनाको निधन भएको छ । यो समाचार तयार पार्दासम्म बंगललादेशमा १८ जना कोरोना संक्रमति भेटिएका छन् । ती मध्ये ४ जना पछिल्लो २४ घण्टामा थपिएका विरामी हुन् । बंगलादेशमा हालसम्म ३ जना कोरोनाको उपचार गरी घर फर्किसकेका छन् । बंगलादेशपनि कोरोनाबाट बच्नका लागि पूर्वतयारीहरु मजबुत बनाएको छ ।

६. माल्दिभ्स्
सार्क राष्ट्रमध्येको एक राष्ट्र माल्दिभ्स्मा हालसम्म १३ जना कोरोना संक्रमित भेटिएका छन् । उनीहरुको राजधानी मालेलगायत देशका विभिन्न क्षेत्रमा रहेको क्वारेन्टाइन सेन्दरहरुमा उपचार भै रहेको छ । माल्दिभ्समा पछिल्लो २४ घण्टामा कोही पनि कोरोना संक्रमित नयाँ विरामी भेटिएका छैनन् । हालसम्म १३ जना भेटिएको र उनीहरुको उपचार भै रहेको छ । उनीहरुको अवस्था सामान्य छ । माल्दिभ्समा हालसम्म कोरोनाका कारण कसैको ज्यान गएको छैन ।

७. श्रीलंका
श्रीलंकामा अहिलेसम्म कोरोना संक्रमित ६० जनाको कोलोम्बो र आपसासका अस्पतालको क्वारेन्टाइन सेन्टरमा राखेर उपचार भैरहेको छ । ती मध्ये ९ जना पछिल्लो २४ घण्टा यता थपिएका हुन् । श्रीलंकामा ३ जना कोरोना प्रभावितको उपचार सफल भै घरमै बसेर स्वास्थ्यलाभ गरिरहेका छन् । श्रीलंकाले पनि आफ्नो देशको स्थल सिमा तथा हवाई सेवालाई कडा बनाएको छ ।

८. भुटान
नेपालपछि कोरोनाको कहरबाट सन्तोषजनक अवस्थामा रहेको अर्को सार्क राष्ट्र हो भुटान । भूटानमा हालसम्म एकजनामा कोरोना संक्रमण देखिएको र उनको अस्पतालमा उपचार भै रहेको छ । अमेरिकाबाट भारत हुँदै भुटान पुगेका ती अमेरिकी नागरिकमा कोरोनासँग मिल्दोजुल्दो लक्षण देखिएपछि भुटान सरकार र प्रधानमन्त्री स्वयंको तदरुकतामा उनलाई क्वारेन्टाइनमा राखेर उपचार गरिँदैछ । भुटानले पनि कोरोनाबाट बच्नका लागि आवश्यक स्वास्थ्य सुरक्षालाई मजबुत बनाएको छ । स्मरणीय के छ भने भुटानका प्रधानमन्त्री स्वयं अस्पतालमा कार्यरत चिकित्सक हुन् ।