Best Khabar Team | २०७६ चैत्र ६ गते बिहिबार

---

१९ मार्च, २०२०
काठमाडौं । कोरोना भाइरसको संक्रमण र यसबाट उत्पन्न हुने सक्ने अवस्थालाई मध्यनजर गर्दै देशको राजधानी काठमाडौं छाडेर गाउँ जाने यात्रुहरुको संख्या ह्वात्तै बढेको छ । चैतको पाँच दिनमा मात्रै (चैत १ गतेदेखि ५ गते राति १२ बजेसम्म ) काठमाडौं छाडेर गाउँ फर्कनेहरुको १ संख्या लाख भन्दा बढी बढेको प्रहरीको भनाई छ । काठमाडौं प्रवेश गर्ने नाकाहरु साँगा, फर्पिङ्ग, नागार्गुन तथा नागढुंगाबाट गरी दैनिक २० हजारको हाराहारीमा साना तथा ठूला सवारी साधनहरुबाट मानिसहरु बाहिरिने गरेको प्रहरीको तथ्यांकले देखाएको छ ।

जबकी यही समयमा काठमाडौं भित्रनेको संख्या निक्कै कम छ । एक त काठमाडौंका अधिकांश विद्यालयहरुको (कक्षा ९ सम्मको) अन्तिम परीक्षा सकिइसकेको तथा अर्कोतर्फ कोरोनाको प्रकोपबाट सर्वसाधारणहरु त्रसित बनेपछि काठमाडौं छाड्नेको संख्या ह्वात्तै बढ्न थालेको छ । साथै सरकारले हिजोमात्रै एसईई तथा चैत्र महिनामा सञ्चालनका लागि तय भएका सबै क्याम्पस तथा विद्यालय तहका सबै परीक्षा तत्कालका लागि स्थगित भएको जनाएपछि थप विद्यार्थी तथा सर्वसाधारण काठमाडौं छाड्दै छन् ।

आज पनि बिहानैदेखि काठमाडौंको नागढुंगा नाकाबाट बाहिरिनेको संख्या बाक्लो रहेको ट्राफिक प्रहरीको भनाई छ । महामारी फैलिए शहर भन्दा गाउँ सुरक्षित हुने ठानेर आफूहरु गाउँ फर्कन लागेको कलंकीमा भेटिएकी गोर्खाकी गोमा वाग्लेले बताईन् । काठमाडौंमा एक त महामारीको डर त्यसमा पनि दैनिक उपभोग्य सामग्रीको अभाव र कालोबजारी तथा चर्को मूल्य । यी सबैलाई छल्नका लागि गाउँ फर्कनुको विकल्प नभएको नयाँ बसपार्कमा भेटिएका नेपालगञ्जका रमेश गिरी बताउँछन् ।

कोरोनाको प्रकोप विश्वव्यापी बनेपछि हाल काठमाडौंमा दैनिक उपभोग्य बस्तु, चामल, ग्यास, पेट्रोल, डिजेल, मट्टितेललगायतको चर्को अभाव देखिन थालेको छ । उपलब्ध भै हालेपनि चर्को मूल्य तिर्नुपर्ने अवस्था देखिएपछि आम नागरिकले काठमाडौंको विकल्प खोज्न थालेका हुन् । हिजोमात्रै सरकारले काठमाडौंलगायत देशभरका स्कुल तथा कलेजहरु चैत्र महिनाभरका लागि बन्द गर्ने घोषणा गरेसँगै काठमाडौंबाट बाहिरिनेको संख्या थप बढेको हो ।

कतिपय बालबालिका पढाउनकै लागि काठमाडौंमा चर्को कोठाभाडा तिरेर बाध्यताबस यहाँ बस्दै आएका छन् । विद्यालय बन्द भएपछि उनीहरुसँग काठमाडौं छाड्नुको विकल्प थिएन । नेपालमा हालसम्म कोरोना संक्रमितको संख्या नभेटिएपनि यसको विश्वव्यापी असरलाई मध्यनजर गर्दै काठमाडौंबाट आम नागरिकहरु आफ्नो गाउँघर फर्कन थालेका हुन् ।

यो संख्या भोलिका दिनमा अझै बढ्ने निश्चित छ । किनभने कतिपय अफिसहरु अहिलेपनि खुल्लै छन् । ती कार्यालयहरु पनि बन्द भएको अवस्थामा काठमाडौं सुनसान प्राय बन्ने निश्चित छ ।

---

Comment from facebook