कोरोनाबारे भ्रम फैलाउने सञ्चारमाध्यम र सामाजिक सञ्जाल प्रयोगकर्तालाई कडा कारबाही गर्ने सरकारको घोषणा

Best Khabar Team | २०७६ चैत्र ५ गते बुधबार

१८ मार्च, २०२०
काठमाडौं । सरकारले विश्वव्यापीरुपमा महामारीको रुपमा फैलिएको कोरोना (कोभिड १९) को बारेमा अनावश्यक समाचार, सूचना तथा जानकारी प्रशारण तथा प्रकाशन गर्ने सञ्चारमाध्यम तथा सामाजिक सञ्जाल प्रयागकर्तालाई कारबाहीको दायरामा ल्याउने भएको छ । पछिल्लो समयमा नेपालका विभिन्न अनलाईन तथा युट्युव च्यानलहरुमा कोरोना भाइरसको बारेमा समाजमा भ्रम फैलाउने खालका तथ्यहिन तथा अनावश्यक जानकारी तथा सूचना सार्वजनिक भै रहेको अवस्थामा सरकारको यो निर्णय आएको हो ।

रक्षामन्त्री ईश्वर पोखरेल संयोजकत्वको कोभिड–१९ संक्रमण रोकथाम तथा नियन्त्रण उच्चस्तरीय समन्वय समितिको आज बसेको बैठकले विश्वव्यापी विपत्तिको यस अवस्थामा समाजमा सहि सूचना प्रवाह गर्न तथा भ्रमण र अनावश्यक सामग्री प्रचारप्रसार नगर्न सबैलाई सूचित गरेको छ । अन्यथा सरकारले उनीहरुलाई कारबाहीको दायरामा ल्याउने भन्दै यस्ता सञ्चारमाध्यम तथा सामाजिक सञ्जाल प्रयोगकर्ताहरुको बारेमा नियमित रुपमा अनुगमन भै रहने बताइएको छ ।

पछिल्लो समयमा नेपालका पुराना सञ्चारकर्मीहरुले सञ्चालन गरेका अनलाईनहरुमै कोरोनाका बारेमा भ्रामक समाचारहरु आउन थालेपछि यसतर्फ आम नागरिकले हेलो सरकार मार्फत् सरकारको ध्यानाकर्षण गराएको थियो । सरकारको यो निर्णय पछि अर्नगल तथा तथ्यहिन सूचना तथा जानकारी प्रवाह गर्नेमाथि कडा कारबाही हुने भएको छ । सञ्चारमन्त्रालय, प्रेस काउन्सिललगायत नियमक निकायहरुले यसको नियमितरुपमा अनुगमन गर्नेछन् ।

कुनै सञ्चारमाध्यम, अनलाईन तथा सामाजिक सञ्जालप्रयोगकर्ताले कोरोना भाइरसको बारेमा भ्रम तथा तथ्यहिन सामग्री प्रकाशन तथा प्रसारण गरेको पाएमा प्रमाणसहित हेल्लो सरकार तथा नजिकको प्रहरीमा खबर गर्न सकिनेछ ।

Comment from facebook