क्यानडाका प्रधानमन्त्री पत्नीलाई कोरोनाको आशंका, प्रधानमन्त्री पनि ‘आइसोलेसनमा’

Best Khabar Team | २०२६ पुष १७ गते बिहिबार

१३ मार्च, २०२०
टोरोन्टो । क्यानडाका प्रधानमन्त्री जस्टिन ट्रुडो र उनकी श्रीमती सोफी ग्रोगोर दुबैजना सेल्फ क्वारेन्टाईनमा बसेका छन् । उनकी श्रीमती सोफीमा कोरोनासँग मिल्दोजुल्दो लक्षण देखिएपछि उनी घरमा क्वारेन्टाईनमा छिन् ।

यस्तै उनका पति पनि यतिबेला आइसोलेसनमा रहेका छन् । यद्यपि प्रधानमन्त्रीमा भने अहिलेसम्म कोरोनासँग मिल्दोजुल्दो कुनै लक्षण देखिइनसकेको यहाँका सञ्चारमाध्यमहरुले जनाएका छन् । ती कम्तीमा २ साता सेल्फ आइसोलेसनमा बस्नेछन् । हालै लण्डनबाट क्यानडा फर्केकी उनकी पत्नी सोफीलाई भने कोरोना सक्रमण भएको हुनसक्ने आशंका चिकित्सकहरुले गरेका छन् ।

क्यानडाका प्रधानमन्त्री जस्टिन ट्रुडो र उनकी श्रीमती सोफी ग्रोगोर : फाइल तस्वीर

यद्यपि ल्याव परीक्षणको रिपोर्ट आइनसकेकोले यसको औपचारिक पुष्टि भने भै सकेको छैन । प्रधानमन्त्री आफैै आइसोलेसनमा बसेपछि उनले भिडियो कन्फ्रेन्समार्फत मन्त्रीपरिषद्को बैठकमा सहभागीता जनाएका छन् । कोरोनाका कारण क्यानडामा अहिलेसम्म १ जनाको ज्यान गएको छ भने एकसयभन्दा बढीमा संक्रमण देखिएका छन् ।