बेलायतमा स्वास्थ्यमन्त्रीलाई पनि कोरोना संक्रमण, घरमै क्वारेन्टाईनमा राखियो

Best Khabar Team | २०७७ कार्तिक १८ गते मंगलबार

११ मार्च, २०२०
लण्डन । पछिल्लो समयमा विश्वव्यापी बन्दै गएको कारोना भाइरसको संक्रमणमा बेलायतकी स्वास्थ्यमन्त्री समेत परेकी छन् । नादीन डोरिज नाम गरेकी बेलायती स्वास्थ्यमन्त्रीमा हालै गरिएको परिक्षणमा कोरोनाको संक्रमण देखिएको हो ।

केहीसमयअघि उनमा कोरोनासँग मिल्दोजुल्दो लक्षण देखिएपछि प्रयोगशालामा गरिएका विभिन्न परिक्षणबाट उनमा कोरोनाको संक्रमण भेटिएको पुष्टि भएको थियो । बेलायतमा रहेको कन्जर्वेटिभ पार्टीका तर्फबाट सांसद समेत रहेकी उनको स्वास्थ्य परिक्षणमा कोरोना देखिएपछि हाल उनलाई उनकै निवासमा क्वारेन्टाइनमा राखिएको छ भने आवश्यक चिकित्सक र चिकित्सकीय सहयोग पनि उपलब्ध गराउँदै आइएको विविसीले उल्लेख गरेको छ ।

पछिल्लो केही महिनायता बेलायतमा फैलिएको कोरोनाका कारण अहिलेसम्म ६ जनाको मृत्यु भै सकेको छ भने करिब ४ सयजनामा संक्रमण देखिएको छ । कोरोनाको संक्रमण फैलिन थालेपछि सरकारले यसलाई नियन्त्रण गर्न विभिन्न उपाय अपनाउन थालेको छ ।