युरोपेली मुलुक इटलीमा भयाबह बन्दै कोरोनाको संक्रमण, एकैदिन ३६ को मृत्यु, १२४७ जना नयाँ संक्रमित

Best Khabar Team | २०७६ फाल्गुन २४ गते शनिबार

०७ मार्च, २०२०
रोम । युरोपेली मुलुक इटलीमा कोरोना भाइरस (कोभिड १९) ले भयाबह रुप लिन थालेको छ । शनिबार मात्रै नाटकीय रुपमा कोरोना भाइरस संक्रमितको संख्या ह्वात्तै बढेको छ । स्थानीय सञ्चारमाध्यमहरुका अनुसार शनिबार मात्रै कोरोनाका नयाँ १ हजार २ सय ४७ जना विरामी थपिएका छन् ।

योसँगै इटलीमा कोरोना संक्रमितको संख्या ५ हजार ८ सय ८३ पुगेको छ । यस्तै शनिबारमात्रै ३६ जनाले कोरोनाको संक्रमणबाट ज्यान गुमाएका छन् । हालसम्म इटलीमा कोरोनाबाट मृत्यु हुनेको संख्या २ सय ३३ पुगेको छ । संक्रमितहरु धेरैजसो बृद्धबृद्दा रहेका छन् । उनीहरुलाई बृद्दअवस्थामा हुने अन्य रोगहरुले च्यापेका बेला कोरानाको संक्रमण समेत थपिएको हो ।

विश्व पर्यटनको केन्द्र रहेको इटलीमा कोरोना भाइरसले संक्रमणको रुप लिन थालेपछि अहिले इटलीबाट बाहिरिने र इटली जाने पर्यटकहरुको संख्या ठप्प भएको छ । यसका कारण इटलीको पर्यटन बजार पनि चौपट बनेको छ । कतिपय शहरहरु बन्द गरिएको छ भने विद्यालयहरु पनि २ साताका लागि बन्द छन् ।