बेल्जियमको लुभेनमा रेलको लिगमा हामफालेर एक नेपालीले रोजे मृत्यु

Best Khabar Team | २०७६ फाल्गुन २३ गते शुक्रबार

०६ मार्च, २०२०
लिंकरोभर । युरोपेली मुलुक बेल्जियममा एक नेपाली युवकले गुडिरहेको रेलको अगाडिको लिगमा हामफालेर आत्महत्या गरेका छन् । पश्चिम नेपालको पर्वत जिल्ला घर भएका ३५ वर्षका सुमन जैसी नामका ती युवक लामो समयदेखि बेल्जियममै बस्दै आएका थिए । उनले २ दिनअघि साँझ लुभेन शहरमा चल्ने रेलको लिगमा हाम फालेका हुन् ।

उनले रेलको लिगमा हामफालेको केही सेकेन्डभित्रै रेल आएर किच्दा उनको घटनास्थलमै ज्यान गएको थियो । झण्डै १४ वर्षदेखि बेल्जियम बस्दै आएका जैसीले किन आत्महत्याको बाटो रोजे भन्ने खुल्न सकेको छैन । यद्यपि पछिल्लो समयमा उनी डिप्रेसनबाट गुज्रिएको उनलाई नजिकबाट चिन्नेहरु बताउँछन् ।

पारिवारिक कारणबाट उनी पीडित बनेको र त्यसबाट उत्पन्न तनावलाई झेल्न नसकेर आत्महत्या गरेको हुनसक्ने अनुमान गरिएका छ । जैसीले अन्र्तजातीय विवाह गरेको र श्रीमतीसँग पछिल्ला केहीवर्षता मनमुटाव रहेको उनी निकटका नेपालीहरुले बताएका छन् । उनकी श्रीमती पनि लामो समयदेखि बेल्जियमै बस्दै आएकी छन् । पछिल्लो समयमा श्रीमतीको परपुरुषसँग सम्बन्ध रहेको आशंका गरेका उनले केही यस्तै फोटोहरु भेटेको भन्दै केही साथीहरुलाई बताएका थिए ।

जसका कारण उनलाई थप तनाव श्रृजना भएको थियो । उनको आत्महत्याको विषयमा त्यहाँका नेपालीहरुले उनको परिवारसँग पनि सोधपुछ गरिरहेको बताइएको छ । पछिल्लो समयमा उनले डिप्रेसनको औषधी समेत खाँदै आएका थिए ।

Comment from facebook