काठमाडौं विमानस्थलमा कोरोना नियन्त्रणको पूर्वतयारी : भिजिटर पास बन्द, विदाई र स्वागतमा विमानस्थल नआउन आफन्तलाई आग्रह

Best Khabar Team | २०७६ फाल्गुन १९ गते सोमबार

०२ मार्च, २०२०
काठमाडौं । विश्वभर प्रकोपको रुपमा देखिएको कोरोना भाइरसको संक्रमणबाट जोगाउनका लागि काठमाडौंको त्रिभुवन अन्र्तराष्ट्रिय विमानथलमा देखिने गरी काम शुरु भएको छ । विमानस्थलमा कोरोना भाइरसको संक्रमण हटाउन स्पे्र छर्कनेदेखि विदेशबाट आउने पर्यटकहरुको थर्मल स्क्यानर समेत शुरु भएको छ ।

यसअघि प्रधानमन्त्री केपी शर्मा ओलीले विमानस्थलमा तत्काल कोरोनाको संक्रमण बारे विशेष सर्तकता अपनाउन आग्रह गरेसँगै त्रिभवुन विमानस्थलमा देखिने गरी काम शुरु भएको हो । अहिले विमानस्थलको विशेष गरी मानिसहरुको आउजाउ बढी हुने ठाउँमा थर्मल स्क्यानरबाट कोरोनाको संक्रमण चेकजाँच शुरु गरिएको छ भने व्याक्टेरिया मार्नका लागि स्प्रे–गर्ने काम शुरु भएको छ । यसैबीच विमानस्थल हेर्ने नागरिक उड्ययन प्राधिकरणले अत्यावश्यक काम बाहेक विमानस्थलमा आउने काम गर्न सबैलाई आग्रह गरेको छ ।

भीडभाडमा संक्रमण छिटो सर्ने भएकाले अत्यावश्यक काम बाहेक विमानस्थलमा आउने तथा जाने काम बन्द गर्न सबैका लागि सूचना जारी गरेको छ । यस्तै विमानस्थलहुँदै बाहिर जाने वा आउने यात्रुहरुलाई लिन तथा पु-याउन पनि नआउन सबैलाई अनुरोध गरेको छ । प्राधिकरणले एक सूचना जारी गरी आफन्त तथा सुभेच्छुकको स्वागत तथा विदाईमा आउने तथा जाने काम बन्द गर्न सबैलाई आग्रह गरेको हो ।

प्राधिकरणले विश्वव्यापी रुपमा प्रकोपको रुपमा फैलिएको कोरोना भाईरस नियन्त्रणका लागि सरकारले अभियान चलाएको भन्दै यसमा सहयोग गर्न सबैलाई आग्रह गरेको छ । विमानस्थलले हाल उपलब्ध गराउँदै आएको भिजिटर पास समेत बन्द गरिएको जनाएको छ । विश्व स्वास्थ्य संगठनले नेपाललाई कोरोना भाईरसको उच्च जोखिमपूर्ण देशको सूचीमा राखेपछि सरकारले यसको संक्रमण रोक्नका लागि प्रभावकारी कार्यक्रम अघि सारेको छ ।