प्रधानमन्त्री ओली शिक्षण अस्पताल भर्ना, बुधबार दोश्रो पटक मृगौला प्रत्यारोपण हुँदै

Best Khabar Team | २०७६ फाल्गुन १९ गते सोमबार

०२ मार्च, २०२०
काठमाडौं । प्रधानमन्त्री केपी शर्मा ओलीको दोश्रो पटक मृगौला प्रत्यारोपण गरिने भएको छ । पछिल्लो केही महिनादेखि मृगौलामा समस्या देखिएपछि प्रधानमन्त्री ओलीले नियमित रुपमा मृगौलाको डाइलाइसिस गरिरहेका छन् । प्रधानमन्त्री ओलीको यो दोश्रो पटक मृगौला प्रत्यारोपण गर्न लागिएको हो ।

मृगौला प्रत्यारोपणका लागि अस्पताल जानुअघि बुबाबाट आर्शिवाद लिँदै प्रधानमन्त्री ओली

यसअघि २०६४ सालमा उनको पहिलो पटक मृगौला प्रत्यारोपण गरिएको थियो । त्यसका लागि प्रधानमन्त्री ओली आज साँझ राजधानीको शिक्षण अस्पतालमा भर्ना भएका छन् ।

आगामी बुधबारका लागि तय भएको उनको मृगौला प्रत्यारोपणका लागि भान्जी नाता पर्ने एक महिलाले मृगौला दान गर्दैछिन् । ओलीलाई मृगौला दिन उनकी भान्जी पनि आजै अस्पताल भर्ना भएकी छन् । प्रधानमन्त्री ओलीको मृगौला प्रत्यारोपण डा. प्रेमराज ज्ञवालीको नेतृत्वमा रहेका चिकित्सकहरुले गर्नेछन् ।

मृगौला प्रत्यारोपण पश्चात् कम्तीमा ७ दिन ओली अस्पतालमा रहने भएका छन् । यसअघि प्रधानमन्त्री ओलीको १२ वर्षअघि प्रत्यारोपण भएको थियो । त्यतिबेला भारतको एपोलो अस्पतालका चित्कित्सकहरुको टोलीले उनको मृगौला प्रत्यारोपण गरेको थियो । यसपटक पनि भारतको सो अस्पतालबाट चिकित्सकहरुलाई बोलाउने तयारी भएको बताइएको छ ।