लक्जेम्बर्ग : दुनियाँको पहिलो देश, जहाँ हुँदैछ सार्वजनिक यातयात निःशुल्क

Best Khabar Team | २०२६ पुष १७ गते बिहिबार

२५ फेब्रुअरी, २०२०
पि.एल ‘तरंग’
लिंकरोभर, बेल्जियम । तपाईँ बसेको शहरमा सार्वजनिक सवारी साधनको उपलब्धता र यात्रा गर्दाको अनुभव कस्तो छ ? सार्वजनिक सवारी साधनमा यात्रा गर्दा कति पैसा तिर्नुहुन्छ वा कत्तिको सहज यात्रा गर्न पाउनुभएको छ ? नेपालमा त सार्वजनिक यातयातमा महंगो भाडा तिरेर यात्रा गर्दा पनि सहज ढंगले यात्रा गर्न कठिन हुने गरेको छ।

विशेषगरी काठमाडौं उपत्यका र आसपासमा चल्ने सार्वजनिक माईक्रोबस र बसहरुमा उभिएर र झुण्डिएरै यात्रा गर्नुपर्ने बाध्यता छ । तर युरोपेली मुलुक लक्जेम्बर्गले विश्वभरका मानिसलाई चकित तुल्याउँदै छ । त्यो के भने अबको केहीदिनपछि लक्जेम्बर्गमा चल्ने सबै सार्वजनिक सवारी साधनमा यात्रा गर्दा यात्रुले एक सेन्टपनि तिर्नु नपर्ने भएको छ ।

आगामी मार्च १ तारिखबाट लागूहुने गरी त्यहाँको सरकारले सार्वजनिक यातयातलाई निशुल्क बनाउन लागेको हो । नयाँ सरकार गठन भएसँगै लक्लेम्बर्गमा सर्वसाधारणलाई राहत हुने गरी नयाँ योजना अघि सारिएको लक्जेम्बर्गका सञ्चारमाध्यहरुले उल्लेख गरेका छन् । हाल लक्जेम्बर्गमा करिब पौने ८ लाख नागरिक बसोबास गर्दछन् । ती मध्ये पौने २ लाख नागरिक आप्रबासी वा विदेशी मजदुर छन् ।

यी सबैलाई राहत हुने गरी सरकारले यो योजना लागू गर्न लागेको हो । पछिल्लो समयमा लक्जेम्बर्गमा रहेका अधिकांश मानिसहरुले आफ्नो व्यक्तिगत गाडी चलाउन थालेपछि उत्पन्न हुनसक्ने वायु प्रदुषण र सवारीको अस्तव्यस्तालाई घटाउन सरकारले निक्कै सुझबुझका साथ यो नियम लागू गर्न लागेको बताइएको छ । एक तथ्यांक अनुसार लक्जेम्बर्गमा हाल साढे ४ लाखको हाराहारीमा निजी गाडीहरु सञ्चालनमा छन् ।

यद्यपि एसियाली मुलुकको तुलनामा यहाँको वायु प्रदुषण एकदमै न्यून छ । तर सरकारले दीर्घकालीन सोचका साथ यो योजना अघि सारेको हो जसका कारण यहाँका जनतालाई सार्वजनिक यातयात प्रयोग गर्न प्रेरणा दिने देखिन्छ । लक्जेम्बर्ग यस्तो मुलुक हो जुन कुल ग्रहास्त आय सबैभन्दा बढी भएको युरोपेली मुलुक हो भने यो देश विश्वकै सबैभन्दा सम्पन्न देशको सूचीमा पर्दछ । यो देशलाई बैंकहरुको शहरको रुपमा पनि चिनिन्छ ।

यहाँ अहिले २० वर्षभन्दा मुनिका युवायुवतीलाई सार्वजनिक यातयातमा निशुल्क यात्रा गर्न सरकारले छुट दिएको छ । सरकारको यो योजना पछि धनी र गरीबबीचको असमानता पनि कम हुने विश्वास लिइएको बीबीसीले उल्लेख गरेको छ । यो नियम लक्जेम्बर्गमा पर्यटकका रुपमा पुग्ने विश्वभरका पर्यटकहरुलाई समेत लागू हुने छ । जसले यहाँ निशुल्क रुपमा सार्वजनिक यातयात सेवा उपयोग गर्न पाउने भएका छन् ।