काठमाडौंको कलंकीमा ट्रकको ब्रेक फेल हुँदा दर्जन सवारी साधनमा क्षति, १ को मृत्यु, केही घाइते

Best Khabar Team | २०७६ फाल्गुन १२ गते सोमबार

२४ फेब्रुअरी, २०२०
काठमाडौं । काठमाडौंको कलंकीमा अघि साँझ एउटा मालबाहक ट्रकको ब्रेक फेल भएर अनियन्त्रित हुँदा एकर्जन सवारी साधनमा क्षति पुगेको छ । कलंकीको ढुंगेअड्डास्थित ओह्रोलामा आइपुगेपछि सो ट्रकको ब्रेक फेल भएको बताइएको छ । ना ६ ख २८७१ नम्बरको ट्रक थानकोटबाट कलंकीतर्फ आउने क्रममा ढुंगेअड्डाको ओह्रालोमा ब्रेक फेल भएको थियो ।

सो ट्रकले ठक्कर दिँदा २ वटा मिनीट्रक, तीन मोटरसाइकल, एउटा स्कर्पियो गाडि, एउटा ट्याक्सी, एउटा सरकारी गाडी र २ वटा स्कुटरमा क्षति पुगेको छ । दुर्घटनामा चितवनको टाँडी घर भएका शमशेर गुरुङ्गको ज्यान गएको छ भने अरु ४ जना घाइते भएका छन् ।

घाइतेहरुको राजधानीको ट्रमा सेन्टरमा उपचार भै रहेको छ । दुर्घटना गराउने ट्रकका चालक सर्लाहीका वीरेन्द्र कुमार शाहलाई प्रहरीले नियन्त्रणमा लिएर अनुसन्धान अघि बढाएको छ ।