तीर्थयात्रा गएका ६ नेपालीको भारतमा भएको बस दुर्घटनामा मृत्यु, २० घाइते

Best Khabar Team | २०२६ पुष १७ गते बिहिबार

२०, फेब्रुअरी, २०२०
नयाँदिल्ली । दक्षिणी भारतको तामिलनाडु राज्यमा आज बिहान एउटा यात्रुबाहक बस विपरित दिशाबाट आइरहेको अर्को बससँग ठोक्किँदा ६ जना नेपाली तीर्थयात्रुको ज्यान गएको छ । सुनसरीको दुबहीबाट ३२ जना यात्रु लिएर राजस्थानका लागि गएको सो बस स्थानीय कन्याकुमारीबाट अघि बढ्ने क्रममा सालिम बेङ्गालुरु सडकखण्डको घुम्तीमा दुर्घटनामा परेको हो । भारतीय सञ्चारमाध्यमका अनुसार दुर्घटनामा ज्यान गुमाउने नेपालीहरुमा २ जना महिला र अरु ४ जना पुरुष रहेका छन् ।

सो घटनामा घाइते भएका अरु २० जनाको स्थानीय अस्पतालमा उपचार भै रहेको बाइएको छ । दुर्घटनामा पूर्वी नेपालको सुनसरी घर भएका ४६ वर्षका वीरबहादुर राई, ५० वर्षका थर उल्लेख नभएका टिकाराम, ५३ वर्षका गोपाल तामाङ्ग, ५० वर्षकी थर उल्लेख नभएकी बोधिनी नामकी महिला रहेकी छन् । यस्तै ५० वर्षका बल्कारी चौधरी र ५५ वर्षका विष्णु थांगेलको पनि दुर्घटनामा ज्यान गएको छ । गोपाल तामाङ्गको उपचारको लागि अस्पताल पु-याउने क्रममा ज्यान गएको बताइएको छ ।

नेपाली यात्रुहरु ३५ दिने तीर्थयात्रका लागि भारतका विभिन्न तिर्थस्थल गएका थिए । घुम्तीमा बस दाहिनेतर्फ मोड्ने क्रममा विपरित दिशाबाट आएको बससँग नेपाली यात्रु सवार बस ठोक्किएको थियो । सो बसमा दुईजना चालक रहेको बताइएको छ । भारतको तामिलनाडुमा आज मात्रै ३ फरकफरक स्थानमा बस दुर्घटना भएका छन् । जसमा २८ जनाले ज्यान गुमाएका छन् ती मध्ये ६ जना नेपालीहरु रहेका छन् । नेपाल र भारतका अधिकांश हिन्दु तीर्थस्थलहरुमा दुबैदेशका धार्मिक पर्यटकहरु वर्षेनी हजारौंको संख्यामा आउने जाने गर्दछन् ।