अछाममा ‘हाइ अल्टिच्यूट’ बाट वडा अध्यक्षको ज्यान गयो

Best Khabar Team | २०७४ श्रावण २२ गते आइतबार

०६ अगस्ट, २०१७
काठमाडौं । सुदुरपश्चिमाञ्चल विकास क्षेत्रमा पर्ने अछाम जिल्लामा लेक लागेर (हाइ अल्टिच्यूटबाट) बाट नवनिर्वाचित वडा अध्यक्षको ज्यान गएको छ । जिल्ला प्रहरी कार्यालयले दिएको जानकारी अनुसार जिल्लाको मल्लेख गाउँपालिका वडा नम्बर ५ का हालै निर्वाचित अध्यक्ष रामबहादुर बोहोराको अल्टिच्युटका कारण ज्यान गएको हो ।

प्रसिद्ध धार्मिकस्थल बाजुराको बडीमालिका जाने क्रममा उनको बाटैमा निधन भएको प्रहरीको भनाई छ । स्थानीय त्रिवेणी नगरपालिका वडा नम्बर ९ स्थित लौरी विनायक भन्ने स्थानमा एक्कासी हाइ अल्टिच्यूट लागेपछि उनी बेहोस बनेका थिए । स्थानीय वासिन्दाका अनुसार उनको केहीबेरपछि सोही स्थानमै ज्यान गएको थियो ।

घटनास्थल पुग्न जिल्ला सदरमुकामबाट २ दिन पैदल यात्रा तय गर्नुपर्नेछ । मृतक बोहोराको शव हाल सोही स्थानमा रहेको र शव ल्याउनका लागि गृहमन्त्रालय मार्फत् हेलिकोप्टर झिकाउन पहल भै रहेको बताइएको छ ।

दोश्रो चरणको स्थानीय तहको चुनावमा बोहोरा मल्लेख गाउँपालिका वडा नम्बर ५ बाट वडा अध्यक्षमा विजयी भएका थिए । नेपाली काँग्रेसबाट वडा अध्यक्षमा विजयी बोहोरा सशस्त्र द्वन्द्वका बेला सशस्त्र प्रहरीमा कार्यरत थिए ।