दिल्लीको मुख्यमन्त्रीमा तेश्रो पटकपनि केजरीवालनै

Best Khabar Team | २०७६ फाल्गुन ४ गते आइतबार

१६ फेब्रुअरी, २०२०
नयाँदिल्ली । नयाँदिल्लीले तेश्रोपटक पनि अरविन्द केजरीवाललाई नै मुख्यमन्त्रीको रुपमा पाएको छ । यहाँस्थित आमआदमी पार्टीका अध्यक्ष समेत रहेका केजरीवालले आज रामिला मैदानमा दिल्लीको मुख्यमन्त्रीको सपथ लिएका हुन् । योसँगै दिल्लीको मुख्यमन्त्रीको रुपमा केजरीवालले तेश्रो कार्यकालको सपथ लिएका छन् ।

दिल्लीका उपराज्यपाल अनिल बैजलले केजरीवाललाई पद र गोपनियताको सपथ दिलाएका थिए । भारतमा हालै सम्पन्न विधानसभा चुनावमा आम आदमी पार्टीले ६२ सिट जितेको थियो । कुल ७० सिटमा भएको चुनावमा भारतीय जनता पार्टीले भने ८ सिटमा चित्त बुझाउनुपरेको थियो । पछिल्लो समयमा भारतमा केजरीवालको कार्यशैली र भ्रष्टाचार विरोधी अभियानका कारण भारतको राजधानी नयाँदिल्लीलगायतका क्षेत्रमा केजरीवाल चर्चित बन्दै गएका छन् । यसअघि २ कार्यकाल दिल्लीको मुख्यमन्त्री बनिसकेका केजरीवालको कार्यशैलीले पछिल्लो समयमा भारतीय युवाहरुको मन जितेको छ ।

उनले विकास निर्माण, शिक्षा, स्वास्थ्यलगयतका कामलाई प्राथमिकतामा राखेर आफ्नो कार्यकालमा देखिने खालके विकासका काम गरेका कारण जनताहरु आम आदमी पार्टी र केजरीवालप्रति विश्वस्त देखिएका छन् ।

पछिल्लो विधानसभाको चुनावको नतिजा पनि यसैको एउटा गतिलो उदाहरण हो ।