सिन्धुपाल्चोकको जुगलमा भेटिएका विरामीमा मौसमी संक्रमण : स्वास्थ्य मन्त्रालय

Best Khabar Team | २०७६ माघ २९ गते बुधबार

१२ फेब्रुअरी, २०२०
चौतरा । सिन्धुपाल्चोकको जुगल गाउँपालिकामा देखिएको सामुहिक विरामीहरुमा कोरोना संक्रमण नभएको स्वास्थ्य मन्त्रालयले जनाएको छ । मन्त्रालयका अनुसार यसअघि जुगल गाउँपालिकाले कोरोना भाइरससँग मिल्दोजुल्लो लक्षणसहितका दर्जनौं विरामी गाउँमा भेटिएको भन्दै स्वास्थ्य मन्त्रालयलाई उनीहरुको परिक्षण गरिदिन आग्रह गरेको थियो ।

तर मन्त्रालयले विषेशज्ञ चिकित्सकको टोलीसहित घटनास्थलमा पुगेर विरामीको परीक्षण गरेकोमा उनीहरुमा कोरोनाको कुनै संक्रमण नभेटिएको जनाएको छ । उनीहरुको हावापानी परिवर्तन हुँदा देखिने मौसमी रुघाखोकी र ज्वरो देखिएको मन्त्रालयको भनाई छ । मन्त्रालयका सचिव खगराज बरालका अनुसार अहिलेसम्म उनीहरुमा देखिएको लक्षण कोरोना भाइरससँग मिल्दोजुल्दो भएपनि त्यो मौसमी भाइरस हो ।

मन्त्रालयले कोरोना भाइरसका विरामी नेपालमा नभेटिएको भन्दै यो विषयमा अनावश्यक हल्ला नफैलाउन सबैलाई आग्रह समेत गरेको छ । सिन्धुपाल्चोकको गुम्बा गाउपालिका–८ मा माघ २७ देखि अहिलेसम्म १ सय भन्दा बढी व्यक्तिमा रुघाखोकी र ज्वरोको लक्षण देखापरेको र, यो कोरोना भाइरस संक्रमण हुनसक्ने भन्दै जुगल गाउँपालिका अध्यक्ष होमनारायण श्रेष्ठले फेसबुकमा स्टाटस लेखेर सरकारलाई पत्र समेत पठाएको जनाएका थिए ।