बरिष्ठ पत्रकार दुर्गानाथ शर्माको निधन

Best Khabar Team | २०७६ माघ २२ गते बुधबार

०५ फेब्रुअरी, २०२०
काठमाडौं । बरिष्ठ पत्रकार दुर्गानाथ शर्मा आज ब्रह्मलिन भएका छन् । उनको उपचारको क्रममा काठमाडौं शिक्षण अस्पताल हातामा रहेको मनमोहन कार्डियो थोरासिक एण्ड भास्कुलर सेन्टरमा आज निधन भएको हो । पछिल्लो समयमा उनी मुटुसम्बन्धी समस्याबाट पीडित थिए । ४ दिनअघिमात्रै उपचारको लागि उनलाई राजधानीको बाँसबारीमा रहेको गंगालाल राष्ट्रिय हृदय केन्द्रमा भर्ना गरिएको थियो ।

त्यहाँबाट शर्मालाई थप उपचारका लागि मनमोहन कार्डियो सेन्टर ल्याइएको थियो ।मुटुमा समस्या भएपछि उहाँको साढे २ दशकअघि ओपन हार्ट सर्जरी गरिएको थियो । अहिले मुटुमा संक्रमणदेखिएपछि पछिल्ला केही समयदेखि उहाँ विभिन्न अस्पतालमा उपचारार्थ भर्ना हुनुभएको थियो ।

नेपाली पत्रकारिताका क्षेत्रका एक मूर्धन्य एवं अग्रणी पत्रकारको रुपमा परिचित शर्माको जन्म २००४ सालमा पूर्वी नेपालको इलाम जिल्लाको फिक्कलमा भएको थियो । ७२ वर्षका शर्माले यसअघि नेपालको पहिलो टेलिभिजन नेपाल टेलिभिजनको महाप्रबन्धकको जिम्मेवारीसमेत कुशलतापूर्वक सम्हाली सकेका थिए । नेपाल टेलिभिजनमा शर्माले लामो समय समाचार बाचनको काम समेत गरेका थिए ।

शर्माको ‘विश्व घटना’ नामक टेलिभिजन कार्यक्रम दर्शकहरुमाझ अत्यन्तै लोकप्रिय मानिन्थ्यो । विश्वभरका सामाजिक, राजनैतिक एवं समसामयिक घटनाहरुसमेटिने सो कार्यक्रम उनकै पहलमा नेपाल टेलिभिजनमा शुरु भएको थियो । स्वर्गीय शर्माका २ छोरा र श्रीमती छन् । शर्माको आजै पशुपति आर्यघाटमा अन्त्येष्टि गरिने पारिवारिक स्रोतले जानकारी दिएको छ ।