जोडियो पोखरा–विराटनगर हवाई सेवा

Best Khabar Team | २०७६ माघ २१ गते मंगलबार

०४ फेब्रुअरी, २०२०
पोखरा । पर्यटकीय नगरीको रुपमा परिचित प्रदेश नम्बर ४ को पोखरा र पूर्वी नेपालको औद्योगिक नगरको रुपमा परिचित बिराटनगरबीच सिधा हवाई सेवा शुरु भएको छ । लामो समयको प्रयासपछि सोमबारबाट पोखरा र बिराटनगर हवाई सेवा शुरुभएको हो ।

यो सँगै बिराटनगरबाट पोखरा र आपसासका क्षेत्रमा आउनेहरुले काठमाडौं आएर त्यहाँबाट अर्को विकल्प खोज्नुपर्ने बाध्यता अन्त्य भएको छ । यस्तै पोखरा र आसपासबाट बिराटनगर जानेहरुले पनि काठमाडौंसम्म पुगेर विमान वा अन्य सवारी साधन लिनुपर्ने अवस्था टरेको छ । यद्यपि अहिले पोखराबाट विराटनगरसम्म बस सेवा सञ्चालनमा रहेपनि हवाई सेवाको पनि माग बढेपछि दुई शहर हवाई सेवाबाट जोडिएका हुन् ।

सोमबार बुद्ध एयरले १८ जना यात्रु बोक्ने क्षमता भएको जहाज उडाएर बिराटनगरबाट पोखरा लगेसँगै दुबै शहरबीच सिधा हवाई सेवाको विधिबत् शुरुभएको छ । पोखरा विमानस्थलले जनाए अनुसार अब हरेक सोमबार, बुधबार शुक्रबार बिहान पौने १२ बजे पोखराबाट विराटनगरका लागि विमान सञ्चालन हुनेछ भने दिउँसो १ बजेर २० मिनेट जाँदा विराटनगरबाट पोखराका लागि सोही विमान उड्ने छ ।

१ घण्टाको समय लाग्ने पोखरा विराटनगरको हवाई यात्राको भाडा भने ६ हजार २ सय रुपैयाँ निर्धारण गरिएको छ । विदेशी पर्यटकको हकमा भने १ सय ३० डलर भाडा तोकिएको छ । भोलिका दिनमा यात्रुको चाप र मागलाई ध्यानमा राखेर दैनिक उडान समेत भर्ने तयारीमा आफूहरु रहेको बुद्धएयरले जनाएको छ ।

दुईदेशबीच सीधा हवाई सेवा शुरुभएपछि यस क्षेत्रका यात्रु पनि खुसी देखिएका छन् । भारतीय नाकाबाट विराटनगरहुँदै नेपाल भित्रने भारतीय तथा अन्य देशका पर्यटकहरुलाई यो हवाई सेवा लाभदायी हुने बताइएको छ । नेपाल भ्रमणवर्षको २०२०लाई सफल बनाउन यो हवाई सेवाले समेत थप मद्दत पुग्ने देखिन्छ ।