चीनमा कोराना भाइरसबाट ज्यान गुमाउनेको संख्या ३६१ पुग्यो

Best Khabar Team | २०७६ माघ २० गते सोमबार

०३ फेब्रुअरी, २०२०
बेइजिङ्ग । कोरोना भाइरसको उद्गम थलोको रुपमा परिचित चीनको बुहान प्रान्तमा मात्रै हालसम्म ३ सय ६१ जनाले ज्यान गुमाएका छन् । यसअघि २ सय १३ जनाको ज्यान गएको तथ्यांक बाहिर आएपनि ४ दिनभित्रमा थप १ सय ४८ जनाको मृत्यु भएको तथ्यांक बाहिर आएको छ ।

चीनियाँ सञ्चारमाध्यमहरुका अनुसार कोरोनाबाट अति प्रभावित चीनको वुहान शहर र आसपासका क्षेत्रका संक्रमणमितहरुकै उपचारका क्रममा ज्यान गएको हो । यसअघि बिहीबारसम्म २ सय १३ जनाले ज्यान गुमाएको तथ्यांक सार्वजनिक गरिएको भएपनि आज सार्वजनिक गरिको तथ्यांकमा मृतकको संख्या बढेको देखाइएको छ । यो रोगका कारण संक्रमित भएका हजारौंको अहिले स्थानीय अस्पतालमा उपचार भै रहेको छ ।

नेसनल हेल्थ कमिसनले जारी गरेको बुलेटिन अनुसार मृतकमध्ये अहिलेसम्म १ जनाको मात्रै चीन बाहिर ज्यान गएको छ त्यो एक फिलिपिनि नागरिक हुन् । सरकारले संक्रमितहरुको उपचारका लागि भन्दै रातारात अस्पताल बनाएर उनीहरुलाई निगरानीमा राखेर उपचार थालेको छ । चीनबाट फैलिएको कोराना विश्वव्यापी बन्दै गएपछि यसको संक्रमणको जोखिम पनि बढ्दो छ । यस्तै, विश्व स्वास्थ्य संगठनले पनि विश्वव्यापी रुपमा स्वास्थ्य क्षेत्रमा आपतकालिन अवस्थाको घोषणा गरिसकेको छ ।