सुनसरीमा गाडी र माइक्रो ठोक्किँदा ४ को मृत्यु, १३ घाइते

Best Khabar Team | २०७६ माघ १९ गते आइतबार

०२ फेबुअरी, २०२०
इनरुवा । पूर्वी नेपालको सुनसरीमा आज बिहान भएको सडक दुर्घटनामा ४ जनाको ज्यान गएको छ भने १३ जना घाइते भएका छन् । जिल्ला प्रहरी कार्यालय सुनसरीले दिएको जानकारी अनुसार सुनसरीको इनरुवा नगरपालिका वडा नम्बर २ मा पर्ने सखुवागाछिमा ना ६ ख ७९५ नम्बरको यात्रुबाहक बस र बा ५ ख ३१५७ नम्बरको आपसमा ठोक्किएको थियो ।

***दुर्घटनाको सांकेतिक तस्वीर : साभार इन्टरनेट***

दुर्घटनामा माइकोबसका चालक धादिङ्गका दिपक खड्का, यात्रुहरु काठमाडौंका हेमराज कोइराला, डोलमाया कोइराला र भक्तपुरकी गरिमा गौतमको ज्यान गएको छ । गौतमको उपचारको क्रममा धरानको विपी कोइराला स्वास्थ्य विज्ञान प्रतिष्ठानमा ज्यान गएको प्रहरीले जनाएको छ ।

कोइरालाद्वयको स्थायी घर पूर्वी नेपालको झापा भएको बताइएको छ । सो दुर्घटनामा घाइते भएका १३ जनाको स्थानीय विभिन्न अस्पतालमा उपचार भै रहेको छ । घाइतेमध्ये केहीको अवस्था गम्भीर रहेको बताइएको छ । दुर्घटनाको कारण खुल्न सकेको छैन । दुर्घटनालगत्तै प्रहरीले यात्रुबाहक नाइट बस र चालकलाई नियन्त्रणमा लिएको छ ।