तीन प्रधानमन्त्री जन्माउने कोइराला निवासमा ताला लाग्यो

Best Khabar Team | २०७६ जेठ २० गते सोमबार

०३ जुन, २०१९
काठमाडौं । नेपालको इतिहासमा एकैघरका तीनभाई प्रधानमन्त्री बनेको र ती तीनभाईको जन्मघरमा पहिलोपटक ताला लागेको छ । नेपालको प्रजातान्त्रिक आन्दोलनको केन्द्रविन्दु तथा जननायक विश्वेश्वरप्रसाद कोइरालाको जन्मथलो विराटनगरको ऐतिहासिक कोइराला निवासमा ताला लागेको हो ।

सरकारले विशिष्ठ व्यक्तिको सुरक्षामा रहेका सुरक्षाकर्मीलाई फिर्ता बोलाउने निर्णय गरेसँगै एकसय वर्ष पुरानो इतिहाँस बोकेको कोइराला निवासमा ताला लागेको हो । सरकारको केहीदिन अघिको निर्णयसँगै बिहीबारबाट कोइराला निवासमा ताला लागेको हो । सरकारको यो निर्णयसँगै अन्य विशिष्ठि व्यक्तिको निवास जस्तै कोइराला निवासमा पनि तालाबन्दी भएको हो । पूर्व विशिष्ठ व्यक्तिहरुको घरमा सुरक्षाकर्मी खटाइएको विषयमा विरोध भएपछि सरकारले तत्काल सुरक्षाकर्मी फिर्ता बोलाउने निर्णय गरेको थियो ।

कोइराला निवासमा हाल परिवारका कोही सदस्य नभएको तथा सुरक्षाकर्मी समेत फिर्ता बोलाइएपछि ताला लगाइएको कोइराला निवास नजिकै घर भएका एक स्थानीयले बताएका छन् । स्मरणीय के छ भने नेपालको इतिहाँसमै पहिलो पटक र विश्वमै विरलै सुनिने एकै परिवारका तीनजना भाईहरु प्रधानमन्त्री बनाउन सफल यो घरसँग इतिहाँस जोडिएको छ । यो घरले पूर्व प्रधानमन्त्रीहरु विश्वेश्वर प्रसाद कोइराला, गिरिजाप्रसाद कोइराला र मातृकाप्रसाद कोइराला लाई हुर्काएको थियो ।

यी तीन पूर्व प्रधानमन्त्रीहरुका पिता कृष्णप्रसाद कोइरालाले राणा प्रधानमन्त्री चन्द्र शम्शेरलाई जनताको वास्तविक अवस्था देखाउन यही निवासबाट फाटेको भोटो पार्सल गरेर पठाएकोले पनि यो घरको विशेष महत्व इतिहाँसमा छ ।

Comment from facebook