आगिञ्चोकमा सडक सकस : ‘कुरिकुरी सरकार’ (भिडियोसहित)

Best Khabar Team | २०७६ माघ ७ गते मंगलबार

काठमाडौंको पश्चिमी छिमेकी जिल्ला धादिङ्ग । काठमाडौंबाट मलेखु हुँदै करिब ९० किलोमिटरको यात्रा पछि पुगिन्छ धादिङ्गबेसी । अनि जिल्ला सदरमुकाम धादिङ्गबेसीबाट २८ किलोमिटर पारगरेपछि पुगिने ठाउँ हो सल्यानटार । पोहोरसम्म सल्यानटारसम्म गाडी पुग्न निक्कै ठूलो हण्डर खेप्नुपर्दथ्यो । यो वर्ष सडक कालोपत्र भएपछि सल्यानटारसम्म त सजिलै गाडी पुग्छ । तर त्यही सल्यानटार हुँदै आगिञ्चोक तर्फ अघि बढ्दा ४ किलोमिटर अगाडीको बाटोले सरकारलाई ‘कुरीकुरी’ गरिरहेको छ ।

जिल्लाको दर्जनौं गाउँका बासिन्दा ओहोर दोहोर गर्ने यो बाटो काठमाडौंको नयाँबसपार्कबाट मुस्किलले १ सय २५ किलोमिटरको दुरीमा छ । तर माघमा पनि गाडी धकेलेर र बाटो खनेरै गाडी लैजानुपर्ने बाध्यताले कुनै दुर दराजको जिल्लाको सडकको छनक दिने गरेको छ । थोरै पानी पर्दापनि यो क्षेत्रको सडक हिलाम्मे हुन्छ ।

प्रस्तुत भिडियोमा हामीले आगिञ्चोकमा सडक विग्रिएको छ भन्ने थाहा पाएपछि गाडीका ‘स्टाफले’ विग्रिएको सडकबाट गाडी उतार्न स्थानीय टारीबेसीबाट बालुवा लिएर अगडि बढेपछिका केही दृष्यहरु समावेश गरेका छौं । काठमाडौंबाट नजिकैको यो ठाउँमा मध्य हिउँदमा देखिएको सडक सकसले सरकार र स्थानीय जनप्रतिनिधिहरुलाई ‘कुरीकुरी’ गरिरहेको छ ।