अन्नपूर्ण आधार शिविरमा हिमपहिरो : ४ विदेशी पर्यटकसहित ६ जनाको अवस्था अज्ञात

Best Khabar Team | २०७६ माघ ३ गते शुक्रबार

१७ जनवरी, २०२०
पोखरा । बहुचर्चित अन्नपूर्ण आधार शिविरमा गएको हिम पहिरोका कारण सो क्षेत्रमा पुगेका आधादर्जन पर्यटक सम्पर्कविहिन भएका छन् । १ चिनियाँ र ३ कोरियाली र २ नेपाली र कुल ६ जना पर्यटक आज बिहानदेखि सम्पर्कविहिन भएको जिल्ला प्रहरी कार्यालय कास्कीले जनाएको छ । गएरातिदेखिको अविरल वर्षाका कारण अन्नपूर्णक्षेत्रमा व्यापक हिमपात हुनुका साथै हिम पहिरोहरु समेत गएको छ ।

कास्कीको अन्नपूर्ण गाउँपालिका–११ हिमालय र देउराली भन्ने ठाउँको बीच भागमा ठूलो हिमपहिरो गएको र सोही स्थान वरिपरि उनीहरु फसेको हुनसक्ने आशंका गरिएको छ । विदेशी पर्यटकसँगै पदयात्रामा गएका २ जना नेपालीहरुसमेत सम्पर्कबाहिर रहेको बताइएको छ । उनीहरुको नाम खुल्न सकेको छैन ।

घटनाको जानकारी पाएलगत्तै पोखरास्थित ट्रेकिङ्ग एजेन्सिज् एसोसिएसन अफ् नेपालको क्षेत्रीय कार्यालय प्रतिनिधि, जिल्ला प्रहरी कार्यालय र विशेषज्ञ उद्दारकर्ताहरुको टोली घटनास्थलतर्फ गएका छन् । यद्यपि खराब मौसम र वर्षाका कारण घटनास्थल पुग्न कठिनाई भएको बताइएको छ । खराव मौसमका कारण सो क्षेत्रमा मोबाईल सेवा समेत अवरुद्ध बनेको छ ।

हिजो साँझदेखि सो क्षेत्रमा वर्षा भै रहेको छ । जसका कारण अन्नपूर्ण आधार शिविर क्षेत्रमा पुगेका सयौं पर्यटक समस्यामा परेका छन् ।