पूर्वराजदूत शर्माको हृदयघातका कारण लण्डनमा निधन

Best Khabar Team | २०७६ माघ २ गते बिहिबार

१६ जनवरी, २०२०

लण्डन । पूर्वराजदूत मुरारीराज शर्माको हृदघातका कारण निधन भएको छ । ६८ वर्षका शर्माको बेलायतको लण्डस्थित पट्नीस्स्थित आफ्नै घरमा बिहान ११ बजेतिर निधन भएको उहाँको पारिवारिक स्रोतले जानकारी दिएको छ बिहानी भ्रमणमा निस्केर घर आएलगत्तै मंगलबार असजिलो महसुस गरेका शर्माको एक्कासी घरमै निधन भएपछि परिवार अहिले शोकमा डुबेको छ । विहानी भ्रमणबाट घर आएर बिहानीको खाजा खाएलगत्तै अप्ठेरो भयो भन्दै एक्कासी बेहोस भएका शर्मा पछि उठेनन् ।

सन् २००७ नोभेम्बर देखि २००९ अप्रिलसम्म बेलायतका लागि नेपाली राजदूतको रुपमा कार्यरत शर्माले २००८ को फेब्रुअरी तेश्रो हप्ता बेलायती महारानी एलिजाबेथ समक्ष ओहोदाको प्रमाणपत्र पेस गरेका थिए । संयुक्त राष्ट्रसंघको स्थायी प्रतिनिधि भएर न्युयोर्कमा समेत काम अनुभव उनीसँग थियो । पूर्वी नेपलको भोजपुर जिल्लामा पर्ने दिङ्गलामा जन्मनुभएका शर्माका २ छोरा अमेरिकामा छन् । उनीहरु चिकित्सक पेशामा कार्यरत छन् ।

४० वर्षअघि नेपालको निजामती सेवामा प्रवेश गरेका शर्मा बेलायतमा रहेका नेपाली तथा विदेशीहरुमाझ सुपरिचित पूर्व कुटनीतिज्ञको रुपमा परिचित थिए । उनको अन्त्येष्टि बेलायतमा गर्ने वा अन्यत्र गर्ने भन्ने विषयमा टुंगो लागिसकेको छैन । छोराहरु अमेरिकाबाट लण्डन आएपछि अन्त्येष्टि कहाँ गर्ने भन्ने निर्णयमा पुगिने लण्डनस्थित उनको आफन्तले जनाएको छ । शर्मा उहाँकी श्रीमतीसँग लण्डनमा बस्दै आएका थिए ।