विप्लव समूहद्वारा ‘भूमाफिया’ ढकालको काठमाडौंस्थित घरमा बम प्रहार

Best Khabar Team | २०७६ माघ १ गते बुधबार

१५ जनवरी, २०२०
काठमाडौं । बहुचर्चित काठमाडौंको ललिता निवासको जग्गा हिनामिना प्रकरणका एक अभियुक्त शोभाकान्त ढकालको घरमा अज्ञात समूहले केहीबेरअघि बम प्रहार गरेको छ । काठमाडौंको सानो भ-याङ्गस्थित ढकालको घरमा आज साँझ साढे ७ बजेतिर नेत्रविक्रम चन्द नेतृत्वको माओवादीले विस्फोट गराएको हो ।

विस्फोटबाट ढकालको घरको झ्यालको सिसाहरु फुटेको छ । यस्तै, विस्फोटबाट उनको घरभित्र पार्क गरिराखिएको निजी गाडीमा समेत क्षति पुगेको छ । विस्फोटको नेत्रविक्रम चन्द नेतृत्वको नेकपा माओवादीले जिम्मा लिएको छ । घटनालगत्तै प्रहरी अहिले घटनास्थलमा पुगेको छ । विस्फोटको आवाज काठमाडौंको बालाजु, कलंकी, ठमेललगायतका क्षेत्रमा सुनिएको थियो ।

बालुवाटारस्थित ललिता निवासको उक्त सरकारी जग्गा व्यक्तिको नाममा पुर्‍याउने प्रमुख खलपात्रका रुपमा चिनिन्छन् शोभाकान्त ढकाल र रामकुमार सुवेदी ।

जसलाई प्रहरीले फेला पार्न नसकेको बताउँछ ।अख्तियार स्रोत अनुसार अख्तियारमा समेत उनीहरू बयानका लागि आएका छैनन् । यस अघि सरकारले पूर्वसचिव शारदा त्रितालको संयोजकत्वमा छानबिन समिति गठन गरेको  थियो, जुन समितिले उक्त अभियुक्तहरुलाई ‘भू–माफिया’ भनेर किटान गरेको छ ।

Comment from facebook