Best Khabar Team | २०७६ पुष २० गते आइतबार

---

०५ जनवरी, २०२०

काठमाडौं । मुलुकको सबैभन्दा ठूलो र एकमात्रै विमानस्थल, त्रिभुवन अन्र्तराष्ट्रिय विमानस्थलमा दैनिकजसो अबैध सुन तथा हिराको तस्करी हुन थालेको छ । यो पनि निक्कै अनौठो र फरक तौर तरिका अपनाएर । केही समयअघिसम्म विभिन्न धातुका भाँडा तथा सुटकेसमा फल्स बटम बनाई सुन तथा अन्य बहुमुल्य धातु तस्करी हुने गरेको भएपनि हाल आएर सुन तस्करीमा नयाँ उपाय अपनाउन तस्करहरु सक्रिय रहेका छन् ।

केहीवर्ष अघि एक थाई युवतीले आफ्नो तीघ्रामा चिरेर सुन राखी पछि माथिबाट टाँका लगाएर काठमाडौं आउँदै गरेको अवस्थामा प्रहरीले पक्रेको थियो । तर विमानस्थलमा सुरक्षामा खटिने प्रहरीले तस्करहरुका तस्करीका तौर तरिका थाहा पाउन थालेपछि तस्करहरु चलाख हुन थालेका हुन् भने उनीहरुले तस्करीका नयाँ नयाँ उपाय अपनाउन थालेका हुन् । कतिपय तस्करहरुले ज्यान नै जोखिममा राखेर स्वास्थ्यमा गम्भीर असर पर्ने गरी, सुन तथा अन्य बहुमुल्य धातुको तस्करी गर्न थालेका छन् ।

प्रहरीको कडा सुरक्षाका बीच पनि स्वदेशी तथा विदेशी तस्करहरुले विभिन्न देशहुँदै नेपालको विमानस्थलबाट सुन तथा हिराको तस्करी गर्ने कोशिष पछिल्लो समयमा तीव्र बनाएका छन्, त्यो पनि अनौठो तरिकाबाट । यो हप्तामात्रै प्रहरीले त्रिभुवन विमानस्थलबाट करिब ६ किलोग्राम सुन र २ सय ग्राम हिरा बरामद गरेको छ । यी हिरा सुटकेस तथा अन्य बस्तुमा राखेर ल्याएको नभै शरीरको भित्रिभागमा राखेर तस्करी गर्ने कोशिष तस्करहरुले गरेका छन् । आजमात्रै प्रहरीले काठमाडौंको त्रिभुवन अन्र्तराष्ट्रिय विमानस्थलबाट ५०० ग्राम सुन र २ सय ग्राम हिरा बरामद गरेको छ ।

यसअघि शनिबार मात्रै प्रहरीले २ किलो सुन बरामद गरेको थियो । आज प्रहरीले आधा किलोग्राम सुनसहित भारतीय नागरिक किजाकेथिल नौसानलाई पक्रेको हो । संयुक्त अरव इमिरेट्सबाट काठमाडौं आएका उनलाई अध्यागमन कार्यायले चेकजाँच गर्ने क्रममा पक्रेको हो । उनको मलद्वारभित्रबाट यो सुनको क्याम्पसुल निकाएिको हो । अर्का भारतीय नागरिक मोहमद म्यादिन स्थालीको साथबाट प्रहरीले २ सय ग्राम हिरा बरामद गरेको थियो । उनले २ सय ग्राम हिराको क्याप्सुल निलेर आएका थिए ।

प्रहरीले अस्पताल लगेर चेकजाँच गराउँदा उनको पेटमा सो परिणाममा हिरा बरामद गरेको हो । यसअघि हिजोमात्रै भारत महाराष्ट्रका नविन गोपी चन्द र भरत सुरेशलालले मलद्वारमा राखेर ल्याएको २ किलोग्राम सुनका ३ वटा क्याप्सुल प्रहरीले बरामद गरेको थियो । यतिसम्म चलाखी गरेर उनीहरुले सो सुन ल्याएका थिएकी विमानस्थलको मेटल डिटेक्टरले समेत थाहा नपाउने गरी तरल स्वरुपमा सुनको क्याम्पुल मलद्वावरमा राखेर ल्याएका थिए । जुनकुरा अस्पतालमा लगेर एक्सरे गरेपछि मात्रै खुल्न आएको थियो ।

यसअघि पुस १५ गते पनि भारतीय नागरिक नागरिक हरेराम नेपालीलाई प्रहरीले मलद्वारमा सुन राखेर विमनस्थलको भन्सार हुँदै काठमाडौं भित्रने क्रममा पक्रेको थियो । केही महिना अघि पनि भारतीय नागरिकहरुले मलद्वारमा राखेर ल्याएको सुन प्रहरीले पक्रेको थियो । यसरी तस्करहरुले तस्करीका नयाँ नयाँ तौर तरिकाहरु अपनाउन थालेपछि विमानस्थलका प्रहरीहरुका लागि यो टाउको दुखाईको विषय बनेको छ । 

---

Comment from facebook