थुनामुक्त भएसँगै १ सय २२ चिनियाँ नागरिकलाई अध्यागमनको जिम्मा लगाईयो

Best Khabar Team | २०७६ पुष २० गते आइतबार

०५ जनवरी, २०२०
काठमाडौं । केहीसाता अघि काठमाडौंका विभिन्न ठाउँबाट पक्राउ परेका १ सय २२ जना चिनियाँ नागरिक आज थुनामुक्त भएका छन् । उनीहरुलाई प्रतिव्यक्ति एक हजार रुपैयाँ जरिवाना लिएर जिल्ला प्रशासन कार्यालयले आज थुनामुक्त गराएको हो ।

पक्राउ परेका चिनियाँ नागरिकबाट बरामद गरिएको विद्यूतीय सामग्री

जिल्ला प्रशासन कार्यालयमा पक्राउ परेका चिनियाँ नागरिकहरुविरुद्ध अभद्र व्यवहारसम्बन्धी कसुरको प्रतिवेदन काठमाडौं जिल्ला प्रशासनमा पेश गरिएको थियो । सोही कसुरमा काठमाडौंका प्रमुख जिल्ला अधिकारी जनकराज दाहालले प्रतिव्यक्ति १ हजार रुपैयाँ जरिवना लिई पक्राउ परेकालाई थुनामुक्त गर्न आदेश दिएसँगै चिनियाँ नागरिक रिहा भएका हुन् । रिहा भएलगत्तै आजै साँझ उनीहरुलाई अध्यागमन विभागको जिम्मा लगाइएको छ ।

केही समयअघि काठमाडौंको मनमैजु, हात्तिगौंडा, बुढानिलकण्ठलगायतका ठाउँमा घर नै लिएर बसेका अवस्थामा उनीहरुलाई पक्राउ गरिएको थियो । नेपालमा बसेर ‘आर्थिक अपराध’ गरेको आशंकामा नेपालस्थित चिनियाँ दुतावासले नेपाल सरकारलाई उनीहरुलाई पक्रन आग्रह गरेको थियो ।

पक्राउ परेकाहरुका साथबाट प्रहरीले ठूलो संख्यमा मोबाइल, ल्यापटप, कम्पयुटर सिपियुलगायतका विद्युतीय सामग्रीसमेत बरामद गरेको थियो । प्रहरीको अनुसन्धानले उनीहरुले कुनै अपराध नगरको निष्कर्ष निकालेपछि आज जिल्ला प्रशासन कार्यालयले उनीहरुलाई थुनामुक्त गर्दै स्वदेश फिर्ता गराउने तयारी गरेको हो ।