कर्णाली प्रदेशमा व्यापक हिमपात, २ बालकको ज्यान गयो, जनजीवन अस्तव्यस्त

Best Khabar Team | २०७६ पुष १९ गते शनिबार

०४ जनवरी, २०२०
काठमाडौं । विकट कर्णाली प्रदेशमा हिजो बिहानदेखि व्यापक हिमपात शुरु भएको छ । कर्णाली अञ्चलका, हुम्ला, जुम्ला, कालिकोट, मुगु, दैलेखलायतका जिल्लाका उच्च हिमाली भूभागमा झण्डै १ फिटसम्म हिउँ जमेको छ । हिमपातका कारण चिसो बढेपछि दैलेखमा राउटे समुदायका २ जना बालकको ज्यान गएको छ प्रहरीका अनुसार जंगलमा बस्दै आएका राउटे समुदायका १४ वर्षीय पीपल शाही र हर्कबहादुर साहिका ४ महिनाका छोरा जंगबहादुरको चिसोका कारण ज्यान गएको छ ।

सकुशल सुतेका दुबै बालकहरुको बिहान उठ्दा ओछ्यानमै मृत अवस्थामा भेटिएका थिए । रातभर परेको हिमपातका कारण बढेको चिसोमा कठ्यांग्रिएर उनीहरुको ज्यान गएको परिवारले जानकारी दिएको छ । बालकको मृत्युसँगै राउटे परिवारमा रुवाबासी चलेको छ । जंगलमा फिरन्ते जिवन विताउँदै आएका राउटे समुदायलाई यसकारले यसअघि नै पक्की घर बनाइने बताएपनि आफ्नो परम्परागत फिरन्ते बसाईलाई उनीहरुले निरन्तरता दिँदा विभिन्न समस्या भोग्दै आएका छन् ।

कर्णाली अञ्चलका अधिकांश जिल्लाहरुमा हिमपातका कारण स्थानीयको जनजीवन प्रभावित बनेको छ । हिमपातका कारण ती जिल्लाहरुमा विद्यालयहरु बन्द छन् भने अन्य सरकारी कार्यालयहरुमा समेत काम प्रभावित बनेको छ । हिमपातका कारण कतिपय जिल्लामा विद्युत् तथा टेलिफोन सेवा अवरुद्ध छ ।

विद्युत् अवरुद्ध हुँदा मोबाइल टावरहरुमासमेत समस्या देखिएको छ । साथै हुम्ला, मुगुलगायतका जिल्लाको तापक्रम माइनस ३ सम्म पुगेको छ । कतिपय हिमाली जिल्लाहरुमा रहेका विमानस्थलमा हवाई सेवा समेत अवरुद्ध बनेको छ । अझै केही साता ती जिल्लाहरुमा चिसो बढ्ने र हिमपात जारी रहने मौसमविद्हरुले जनाएका छन् ।