‘अब्बल विकास बैंक’ बनाउने कामना सेवाको उद्घोष

Best Khabar Team | २०७६ माघ १८ गते शनिबार

०२ जनवरी, २०२०
काठमाडौं । अहिलेको प्रधिस्पर्धात्मक बैकिङ्ग बजारमा आफूहरुलाई पृथक र अब्बल विकास बैंकको रुपमा विकास गर्ने उद्घोष कामना सेवा विकास बैंकले गरेको छ । काठमाडौंमा आज बैंकले १३ औं वार्षिक साधारणसभाको अवसरमा गरेको कार्यक्रममा पछिल्ला वर्षहरुमा बैंकिङ्ग क्षेत्र निक्कै प्रतिपर्धात्मक रहेको भन्दै ग्राहकको मन जित्नेगरी आफ्ना बैंकको सबै शाखाहरुबाट अत्याधुनिक, अब्बल र प्रविधिमैत्री सेवा प्रदान गर्ने घोषणा गरेको हो ।

**तस्वीर सौजन्य : कामना सेवा विकास बैंक**

बैंकका अध्यक्ष सुदिप आचार्यका अनुसार यसका लागि बैंकले आन्तरिक गृहकार्य अघि बढाएको छ । आचार्यले समाजका सबै क्षेत्र, वर्ग र समुदायलाई समेट्ने गरी कामना विकास बैंकलाई अत्याधुनिक ढंगले अघि बढाउने बताउनुभयो । त्यस अवसरमा आचार्यले आर्थिक वर्ष ०७५/०७६ को आम्दानी तथा खर्च, नाफा/नोक्सानको हिसाब, नगदप्रवाह विवरण प्रस्तुत गर्नुभएको थियो । आजको साधारणसभाले सेयरधनीहरुलाई १७ करोड २७ लाख ३३ हजार दुई सय ८४ नगद लाभांश वितरण गर्ने सम्बन्धी प्रस्ताव समेत पारित गरेको छ ।

यसरी वितरण गरिने नगद लाभांश २०७५र०७६ को मुनाफा, हाल कायम चुक्तापूँजी दुई अर्ब ५४ करोड एक लाख ९५ हजार तीन सय ५२ को ६ दशमलव ८ प्रतिशतका दरले हुन आउने रकम हो । कार्यक्रममा बैंकका प्रमुख कार्यकारी अधिकृत प्रविण बस्नेतले बैंकको दीर्घकालीन रणनीति प्रस्तुत गर्नुभएको थियो । उहाँले ग्राहकमैत्री कार्यक्रम अघि सारेर सबैले आफनै बैंक हो भन्ने ढंगले कामना सेवा विकास बैंकले दीर्घकालीन रुपमा काम गर्ने रणनीति लिएको बताउनुभयो ।