अख्तियारका पूर्वआयुक्त पाठक ७८ लाख धरौटीमा छुटे, बैंक बस्यो ग्यारेन्टी

Best Khabar Team | २०७६ जेठ १ गते बुधबार

१५ मे, २०१९
काठमाडौं । ७८ लाख रुपैयाँ घुस लिएको आरोपमा पक्राउ परेका अख्तियार दुरुपयोग अनुसन्धान आयोगका पूर्व आयुक्त राजनारायण पाठक धरौटीमा रिहा भएका छन् । उनले आज विशेष अदालत काठमाडौंमा ७८ लाख रुपैयाँ धरौटी रकम बुझाउने कबुल गरेसँगै उनी तारेखमा रिहा भएका हुन् ।

उनको धरौटी रकमका लागि नेपाल बंगलादेश बैंक ग्यारेन्टी बसेको छ । विशेष अदालतमा आज पाठकको मुद्दामा भएको थुनछेकको बहसमा अध्यक्ष बाबुराम रेग्मी तथा सदस्यहरु प्रमोदकुमार श्रेष्ठ वैद्य र द्वारिकामान जोशीको इजलासले धरौटी रकम मागेका हुन् । केही समय अघि ७८ लाख रुपैयाँ घुस लिई नेपाल इन्जिनियरिङ्ग क्याम्पसको जग्गा विवाद सुल्झाइदिने भन्दै अख्तियार प्रमुख पाठकले बोलेको भिडियो सार्वजनिक भएपछि अख्तियारले नै उनी विरुद्ध विशेष अदालतमा मुद्दा दायर गरेको थियो ।

घुस लिएको भिडियो सार्वजनिक भएपछि पाठकलाई अख्तियार प्रमुखको जिम्मेवारीबाट हटाईएको थियो । उनीमाथि परेको मुद्दाको थुनछेक बहसका लागि पाठकलाई आज विशेष अदालतमा उपस्थित गराइएको थियो ।

Comment from facebook