पाल्पाको १० वटै स्थानीय तहमा कोरोना संक्रमण फैलियो

Best Khabar Team | २०७७ असार ११ गते बिहिबार

२५ जुन, २०२०
तानसेन, पाल्पा । पाल्पा जिल्लाका १० वटै स्थानीय निकायमा कोरोना संक्रमण फैलिएको छ । आजमात्रै पाल्पाका विभिन्न स्थानीय निकायका १ सय २१ जनामा कोरोना संक्रमण देखिएसँगै पाल्पाका १० वटै स्थानीय निकायमा कोरोनाको संक्रमण फैलिएको हो । आज पाल्पाको तानसेन नगरपालिका तथा निस्दी, पूर्वखोला, रम्भा, तिनाउलगायतका गाउँपालिकाका १ सय २१ जनामा कोरोना संक्रमण देखिएको छ ।

रुपन्देही र चितवनका प्रयोगशालामा गरिएको स्वाब परीक्षणका क्रममा उनीहरुमा कोरोना संक्रमण देखिएको जनस्वास्थ्य कार्यालयले जनाएको छ । आज एकैदिन पाल्पाको निस्दी गाउँपालिकाका ९८ जनामा कोरोना देखिएको छ । यस्तै पूर्वखोला गाउँपालिकामा १८ जनामा र रम्भा गाउपालिकाका ६ जनामा कोरोना संक्रमण देखिएको हो । यता तानसेन नगरपालिकाका ३ जनामा पनि कोरोना संक्रमण पुष्टि भएको छ ।

विभिन्न समयमा भारतबाट फर्केकाहरुको स्वाब परीक्षणका क्रममा उनीहरुमा कोरोना संक्रमण पुष्टि भएको छ । योसँगै पाल्पामा मात्रै कोरोना संक्रममितको संख्या ३ सय ६९ पुगेको छ ।

Comment from facebook