ज्वरोका कारण २ दिनमा उपत्यकाका अस्पतालमा तीनको मृत्यु, कोरोनाको जाँचका लागि नमुना टेकु अस्पताल पठाइयो

Best Khabar Team | २०२६ पुष १७ गते बिहिबार

३० मार्च, २०२०
काठमाडौं । अत्यधिक ज्वरो र स्वास प्रश्वाससम्बन्धी समस्या देखिएर अस्पताल पु¥याइएका तीन जनाको राजधानीका विभिन्न अस्पतालमा निधन भएको छ । काठमाडौंको वीर अस्पतालमा दुई र ललितपुरस्थित पाटन अस्पतालमा एकजनाको गरी जम्मा तीन जनाको अध्यधिक ज्वरोका कारण मृत्यु भएको हो ।

काठमाडौंको वीर अस्पतालमा उपचाररत एक युवकको आज निधन भएको छ । कोरोनाको आशंका गर्दै आइतबार अस्पताल भर्ना भएका ती युवकको उपचारको क्रममा आज सोमबार अस्पतालमा निधन भएको वीर अस्पताल स्रोतले जानकारी दिएको छ । काठमाडौंको सतुंगल घर भएका ती युवक हिजोमात्रै अस्पतालमा भर्ना भएका थिए । केही समयअघि भारतबाट फर्केलगत्तै उनी ज्वरो आउने तथा रुघा लाग्ने लक्षण लिएर वीर अस्पतालमा भर्ना भएका थिए ।

उनको स्वाब परिक्षणका लागि टेकुस्थित केन्द्रीय प्रयोगशाला पठाईएको वीर अस्पतालका निर्देश डा. केदार सेन्चुरीले जानकारी दिए । यस्तै आज मात्रै वीर अस्पतालमा उपचारका लागि ल्याइएकी एक महिलाको अस्पतालको आकस्मिक कक्षमै मृत्यु भएको थियो । उनी काठमाडौंको कालीमाटीमा बेहोस अवस्थामा भेटिएकी थिइन् । अस्पताल ल्याउँदा उनमा अत्यधिक ज्वरो रहेको र सास फेर्न समेत कठिनाई भै रहेको थियो ।

उनमा पनि कोरोनाको आशंका गरिएको र नमुना परिक्षणका लागि स्वाब टेकु प्रयोगशाला पठाइएको छ । यस्तै हिजो मात्रै धादिङ्गका एक युवकको पाटन अस्पतालमा निधन भएको थियो । उनमा पनि ज्वरो र स्वास प्रस्वासमा समस्या देखिएपछि अस्पताल भर्ना गरिएको थियो । ती युवकको पनि नमुना परिक्षणको रिपोर्ट आइसकेको छैन । यद्यपि अहिलेसम्म नेपालमा कोरोनाको कारण मृत्यु भएको भन्ने पुष्टि कसैको पनि भै सकेको छैन ।

Comment from facebook