धादिङ्मा एकै परिवारका ४ जना त्रिशुलीमा हेलिए, आमाको मृत्यु, २ छोरा वेपत्ता

Best Khabar Team | २०७६ माघ २ गते बिहिबार

१६ जनवरी, २०२० धादिङ्ग । पृथ्वीराजमार्गमा पर्ने धादिङ्गको बेनिघाटमा एकै परिवारका ४ जना त्रिशुली नदीमा हेलिएका छन् । जिल्ला प्रहरी कार्यालय धादिङ्गका अनुसार काठमाडौं चन्दागिरी नगरपालिकाका थानकोट बस्ने बिनय लामिछाने श्रीमती र २ नाबालक छोरासहित आज साँझ त्रिशुली नदीमा हाम फालेका हुन् ।

स्थानीय बेनिघाट रोराङ्ग गाउँपालिकाको बाँदरेस्थित झलुंगे पुलबाट साँझ अन्दाजी ७ बजेतिर हामफालेका लामिछानेलाई प्रहरीले जिवितै उद्दार गरेको भएपनि श्रीमतीको भने मृत्यु भएको छ । सो घटनामा लामिछानेका दुई बच्चा वेपत्ता भएका छन् । साँझ अबेरसम्म उनीहरुको खोजी कार्य जारी राखिएपनि यो समाचार तयार पार्दा सम्म उनीहरुलाई फेला पार्न सकिएको छैन ।

काठमाडौंबाट माघेसंक्रान्ति बनाउन धादिङ्गको आदमघाटस्थित ससुराली आएका बेला श्रीमती जमुनासहित लामिछानेले त्रिशुलीमा हामफालेर आत्महत्याको प्रयास गरेका हुन् । घटनामा उनका २ वर्ष र ६ महिनाका २ छोरा वेपत्ता भएको जिप्रका धादिङ्गको भनाई छ । चर्को ऋण लिएका लामिछाने परिवारले त्यसैको व्याज तिर्न नसकेर आत्महत्या गरेको प्रहरीको अनुसन्धानले देखाएको छ । यस विषयमा प्रहरीले थप अनुसन्धान अघि बढाएको छ ।

Comment from facebook