प्रधानमन्त्री ओली युरोप आउँदै

Best Khabar Team | २०७६ जेठ १९ गते आइतबार

पी.एल. तरंग/ब्रसेल्स
०२ जुन, २०१९
यही जुन ८ तारिखमा स्विटजरल्याण्डको जेनेभामा हुने एक अन्र्तराष्ट्रिय कार्यक्रममा सहभागी हुन प्रधानमन्त्री केपी शर्मा ओली युरोप आउनुहुने भएको छ । जुन ८ मा जेनेभामा हुने अन्तर्राष्ट्रिय श्रम संगठनको साधारणसभामा सहभागी हुन नेपाली प्रतिनिधि मण्डलको नेतृत्व गर्दै प्रधानमन्त्री ओली सोहीदिन जेनेभा आइपुग्नुहुने भएको हो ।

यस पटकको युरोप भ्रमणका क्रममा प्रधानमन्त्री ओलीले एकसाता युरोपमा विताउनुहुने परराष्ट्रमन्त्रालय स्रोतले जानकारी दिएको छ । स्विट्जरल्याण्डको कार्यक्रम सकिएपछि प्रधानमन्त्री बेलायत जानुहुने भएको छ । त्यहाँको प्रसिद्ध अक्सफोर्ड विश्वविद्यालयमा आयोजित एक कार्यक्रममा प्रधानमन्त्रीले सहभागीता जनाउनुहुने छ । त्यसक्रममा उहाँले सम्बोधन समेत गर्ने कार्यक्रम रहेको छ । बेलायतमा रहँदा प्रधानमन्त्री ओलीले त्यहाँका नेपालीहरुसँग समेत भेटवार्ता गर्ने कार्यक्रम रहेको छ ।

बेलायतको कार्यक्रमपछि प्रधानमन्त्री ओली युरोपेली मुलुक फ्रान्सको भ्रमणमा जानुहुने भएको छ । पेरिसमा रहँदा प्रधानमन्त्री ओलीले राजनीति भेटवार्ता गर्ने कार्यक्रम रहेपनि यसविषयमा परराष्ट्र स्रोतले कुनै कार्यक्रम सार्वजनिक गरेको छ । पेरिसमा रहँदा प्रधानमन्त्री ओलीले त्यहाँस्थित नेपाली कुटनीतक नियोग तथा नेपाली समुदायका प्रतिनिधिसँग छलफल गर्ने कार्यक्रम तय भएको छ । एक साता लामो युरोप भ्रमण पुरा गरी उहाँ जुन १६ मा काठमाडौं फर्कनुहुने कार्यक्रम रहेको छ ।